Мемлекет басшысы Қасым-Жомарт Тоқаевтың «Түркістан» газетіне берген сұхбатымен танысып шықтым. Онда Президент Қазақстандағы салық саясаты, экономиканың өткен жылғы өсімі, Үкіметтің атқарған жұмысы, инфрақұрылым, көлік және логистика салаларын дамыту мәселелеріне қатысты бірқатар сұраққа толымды жауап берді. Әңгіме барысында сондай-ақ өз ұстанымы мен ой-тұжырымдарын ортаға салып, көтерілген мәселеге көзқарасын ашық білдіргені ұнады.
Президент жауабында тағы бір әсер еткені әскердегі сарбаздар өлімі жайлы сұраққа жауап беруі болды. Әскери борышын өтеуге шақырылған сарбаздардың жарақат алуы мен қаза болуына қатысты оқиғалар – өркениетті елге жат, теріс үрдіс екенін айтты. «Бейбіт заманда мұндай жайттар болмауы тиіс. Бұл туралы барлық күштік құрылым басшыларымен жуырда өткен кеңесте де айттым. Қорғаныс саласына жауапты мекеменің басшылығын тәрбие жұмысын дұрыс қадағаламай отырғаны үшін сынға алдым. Армия жастарға қолдау көрсетіп, оларды еліміздің нағыз азаматы ретінде тәрбиелеп шығаруы керек. Командирлер әскери қызметшілерге үлгі-өнеге болуы тиіс. Әскерде әлімжеттікке, бұзақылыққа, рушылдыққа, жершілдікке орын жоқ, ондай жайттарға жол берілмейді. Мұның бәрін өзім жеке қадағалап отырамын» – деді Мемлекет басшысы. Президент ахуалды түзеу үшін шұғыл шаралар қабылдау жөнінде бұйрық бергенін атап өтті.
Әмірхан Бәкіров,
еңбек ардагері, Жамбыл ауданының Құрметті азаматы
