Биыл Қазақстан халқы ел тәуелсіздігінің 35 жылдық мерейтойын атап өтеді. Тарихи тұрғыдан алғанда бұл қас-қағым сәт болып көрінгенімен, еркіндігін жария етіп, еңсесін тіктеген ел үшін тағдыршешті кезең болғаны түсінікті.
Мемлеет басшысы Қасым-Жомарт Тоқаев «Түркістан» газетіне берген сұхбатында осы жылдар ішінде көптеген игі істер атқарылғанын айта келіп, жетістіктерімізбен бірге кемшіліктердің де кеткенін тілге тиек еткен. Ал, алдағы уақытта жасалатын жұмыстар одан да көп. Осы орайда биылғы жылға жоспарланған конституциялық реформалар, сөз жоқ, дамудың жаңа бағытын айқындап бермекші.
“Мен Қазақстанның президенттік басқару үлгісіндегі мемлекет екенін бірнеше рет айттым. Осыдан 8 жыл бұрын, яғни Ақордаға келгенге дейін «Күшті Президент – Ықпалды Парламент – Есеп беретін Үкімет» тұжырымдамасын жарияладым. Жеке бастың қамын күйттеп, мемлекеттік жүйені тұтастай өзгерте салу барып тұрған жауапсыздық, тіпті, адамгершілікке жатпайтын әрекет болар еді. Еліміз үшін аса маңызды реформаның бәрі жалпыхалықтық референдумға шығарылады.
Бұл жерде ешқандай астыртын ойлар жоқ. Менің ұстанымым баршаға белгілі, саяси реформалар жалғаса береді. Ұзақ мерзімге арналған жоспардың бір бөлігі әдеттегідей жақын арада жарияланады” – деді ол сұхбатында.
Сонымен қатар биыл ел тағдырына тікелей әсер ететін, Қазақстанның ұзақ жылға арналған бағыт-бағдары айқындалатын жыл болатынын да жеткізген. “Мен конституциялық реформаға қатысты референдум өтетінін алдын ала айттым. Қазір сарапшылар тобымен бірге Ата Заңымыздың редакциясына қатысты ұсыныстарды қарап жатырмыз. Жоспарланған өзгерістер өте көп, бәрі тұтаса келгенде, жаңа Конституция қабылдаумен пара-пар қадам жасаймыз деуге болады” – деді ол сөзін қорытындылай келе.
Иә, елімізге өркениет көшінен қалмай, тұрақты даму үшін саяси реформалар қажет екені түсінікті. Біз, «Аманат» партиясының өкілдері ретінде Президенттің бастамаларына түсіністікпен қарап, оның жүзеге асырылуына қолдау көрсете береміз.
Қаныбек Айтжанов,
«Аманат» партиясы Қарасай аудандық филиалының төрағасы
