Іле ауданында медициналық қызмет сапасын арттыру бағытындағы жұмыстар жүйелі түрде жүзеге асырылып келеді. Соңғы жылдары өңірдегі денсаулық сақтау мекемелерінің материалдық-техникалық базасын нығайтуға ерекше көңіл бөлінуде. Жуырда Іле ауданының әкімі Қайыржан Жақсымбетов медицина ұйымдарына арналған жаңа санитарлық көліктердің кілтін табыстады.
«JAC» маркалы төрт жаңа көлік ауылдық елдімекендерге жіберілмек. Бұл шұғыл шақыртуға дер кезінде жетуге, науқастарға жедел әрі сапалы медициналық көмек көрсетуге және ауыл тұрғындары үшін қызметтің қолжетімділігін арттыруға мүмкіндік береді.
– Іле ауданы халқының саны жыл сайын өсіп келеді. Соған сәйкес елдімекендерде «Жедел жәрдем» көліктеріне деген сұраныс артты. Жаңа көліктер ауылдық округтердегі шұғыл медициналық көмек жүйесін айтарлықтай күшейтеді деп сенеміз, – деді Іле аудандық орталық ауруханасы директорының орынбасары Нұрлан Нұртайұлы.
Денсаулық сақтау инфрақұрылымын дамыту аясында бірқатар маңызды жоба іске қосылды. 2025 жылы Көктерек ауылында фельдшерлік-амбулаториялық пункт пайдалануға берілді. Ал биыл қаңтар айында тағы екі амбулаторияны ашу жоспарланып отыр.
Медициналық мекемелер кезең-кезеңімен жоғары технологиялық құрал-жабдықтармен қамтамасыз етілуде. Атап айтқанда, магниттік-резонанстық томография (МРТ) аппараттары, ангиографтар, сондай-ақ онкологиялық ауруларды ерте анықтауға арналған диагностикалық құрылғылар сатып алынуда. Бұл қауіпті дертті ерте кезеңде анықтап, тиімді ем жүргізуге жол ашады. Сонымен қатар ауданда ветеринария саласына да айрықша қолдау көрсетілуде. Әлеуметтік маңызы бар салаларды қолдау мақсатында «Өнеркәсіпті дамыту қоры» арқылы лизингтік қаржыландыру тетігі іске қосылып, нәтижесінде ветеринарлық қызметке арналған алты арнайы техника алынды.
Қарой ауылдық округінің ветеринарлық меңгерушісі Бағдат Мырзахановтың айтуынша, жаңа техниканың келуі жұмыс тиімділігін арттырған.
– Бізге соңғы рет техника 2013 жылы берілген еді. Уақыт өте келе көліктер тозып, жол жүру қиындап, жұмыс баяулады. Қарой ауылдық округі – мал шаруашылығы дамыған ең ірі аймақтардың бірі. Бір бағытта 200 шақырымға дейін жол жүреміз. Осы мәселені ескеріп, қолдау көрсеткен облыс және аудан басшылығына алғысымыз шексіз, – деді ол.
Бағдат ШОЙБАС
Іле ауданы
