Жылдың төрт мезгілінде де ат үстінде жүретін малшылар қауымының жұмысы қыс айларында күрделене түсетіні бәрімізге мәлім. Осы кезеңде мал қыстату сынды жауапты науқан алдыларынан көлденеңдеп шығады. Жауапкершілігі жоғары науқанда мал өсірумен айналысатын шаруашылық иелері арқаны кеңге созып, жайбарақат жүруіне әсте болмайды.
Балқаш өңірінде төрт түлігін түлеткен ірілі-ұсақты бірқатар шаруашылықтар бар. Аудан көлемінде 115 бас түйе, 31897 бас жылқы, 117270 бас ірі қара және 106439 бас қой-ешкі өрістеуде. Қысқы мал азығы ретінде 40 000 тонна шөп, 26 000 тонна жем, 60 000 тонна сүрлем және 27 000 сабан дайындалған.
Мал қыстату науқаны аудан басшысының тікелей назарында тұрғандықтан ауылшаруашылық мамандары бұл жұмысты үнемі бақылауына алып отырады. Осы мақсатта жауапты сала мамандарымен Ақдала ауылдық округіне қарасты «Ерлан» шаруа қожалығына арнайы барып қайттық.
Аталмыш қожалыққа атбасын бұрғанымызда шаруашылықтың төрағасы Бейбіт Бегімжанов үлкен ағасы Әнуармен атқарылып жатқан істер жайында әңгіме өрбітіп тұр екен. Ол алыстан ат терлетіп келген газет тілшісін көргенде жауапты һәм күрделі науқанды қалай еңсеріп жатқаны жөнінде баяндай жөнелді.
Бейбіттің айтуынша, қысқы мал азығын дайындау жұмысын жүйелі жүргізіп, жаз айларында 80 тонна жем, 80 орама жоңышқа шөбін және 70 орама табиғи шөптер даярлап алған. Мал қыстату науқанына ерте қамданған шаруашылықта қысқы мал азығы жеткілікті екен.
Тынымсыз еңбектің толағай жемісін көріп отырған шаруашылық төрағасы көмекші шопанның отбасы жайдайына байланысты сұранып кеткенін және оларға барлық қажетті жағдайды жасап отырғанын тілге тиек етті.
Әңгіме барысында Бейбіт Әліпбайұлы «Ерлан» шаруа қожалығы 1998 жылы Әліпбай әкесінің көзі тірісінде құрылғанын және бүгінгі таңда шаруашылығында 30 бас жылқы, 120 ірі қара және 140 бас қой-ешкі бар екенін айтты. Ауызбірлігі жарасқан ағайынды жігіттер мал қыстату, төлдету және қысқы мал азығын дайындау жұмыстарын үнемі бірлесіп атқарады.
Шаруашылықтың басы-қасында Бейбіттің өзі жүргендіктен өмірлік жары Сәуле Бекжігітова да сол жерде малды ауылдың күйбең тірлігін бірге атқарады. Төрт түлік мал өсірумен айналысатын шаруалар жылдың төрт мезгілінде де тыным таппай еңбек етеді. Сондықтан да бұл жауапты істе де олар қырағылық танытуда. «Қыстай берсе – қыспай берсін» деген қанатты сөзді тірек еткен жандар бұл жауапты науқанның да өз дәрежесінде өтеріне сенімді.
Бақтығали ДӘУІТБАЙ
Балқаш ауданы
