Ұлттық құрылтайдың V отырысында көтерілген мәселелер еліміздің ұзақ мерзімді дамуына, ұлт болашағына тікелей әсер ететін аса маңызды бастамалар екені сөзсіз. Бұл жиында айтылған ой-пікірлер мен айқындалған міндеттер қоғамның барлық саласына, соның ішінде білім беру жүйесіне де нақты бағдар беріп отыр.
Білім беру саласының өкілі, ұстаз ретінде Құрылтайда көтерілген бастамаларды толық қолдаймын. Әсіресе ұрпақ тәрбиесі, ұлттық құндылықтарды сақтау, сапалы әрі қолжетімді білім беру, қоғамдағы азаматтық жауапкершілікті күшейту мәселелерінің күн тәртібіне шығуы – бүгінгі заманның басты талабы. Себебі елдің ертеңі – бүгінгі жас ұрпақтың қолында, ал олардың қандай тұлға болып қалыптасуы тікелей білім мен тәрбиеге байланысты.
Құрылтайда белгіленген мақсаттар мен міндеттер білім беру ұйымдарының күнделікті қызметімен өзара үндес. Жас ұрпақты елжанды, саналы, ойы сергек, бәсекеге қабілетті азамат етіп тәрбиелеу – ұстаздар қауымының негізгі миссиясы. Осы орайда ұлттық құндылықтарды білім беру мазмұнына терең енгізу, оқушылардың рухани-адамгершілік дамуына басымдық беру ерекше маңызға ие.
Сонымен қатар Ұлттық құрылтайда көтерілген ел бірлігі мен қоғамдық келісімді нығайту мәселесі де білім ордаларынан бастау алуы тиіс. Мектеп пен жоғары оқу орындары тек білім беретін мекеме ғана емес, қоғамдағы татулық пен өзара құрметті қалыптастыратын маңызды орта.
Ұлттық құрылтайдың V отырысында қабылданған шешімдер мен ұсыныстарды қолдай отырып, оларды іс жүзінде жүзеге асыру – әрбір азаматтың, әрбір сала өкілінің ортақ міндеті. Ортақ мақсат жолында бірлесе еңбек еткенде ғана тұрақты даму мен жарқын болашаққа қол жеткізе аламыз.
Билибаев Айбар Тұрарұлы,
Алатау қаласы №2 орта мектеп директоры
