Оқу-ағарту министрлігі лагерь сөзін орталық атауымен өзгерту мәселесін пысықтап жатыр.
Еске сала кетейік, Мәжіліс депутаты Дәулет Мұқаев балалар лагерін жазғы сауықтыру орталығы сөзімен ауыстыру керектігін алға тартып, Оқу-ағарту министрінің атына сауал жолдаған еді.
Оның айтуынша, лагерь сөзі тарихта жаман атпен қалған. Оны құлаққа жағымды естілетін басқа сөзбен алмастыратын уақыт жетті дейді депутат.
«Аты қорқынышты Карлаг, Алжир лагерлерінің пайда болу тарихы баршаға мәлім. Сондықтан ұлттық сана-сезімді жаңғыртуда лагерь атауын алмастырудың мәні зор деп білемін. Лагерь емес, жазғы демалыс орны немесе сауықтыру орны дегеніміз жөн», – дейді Дәулет Мұқаев.
Министрлік тарапынан халық қалаулысының сұрағына мынадай жауап келген.
«Білім беру ұйымдары түрлерінің номенклатурасын бекіту туралы «ҚР Білім және министрінің 2013 жылғы 22 ақпанындағы №50 бұйрығына өзгерістер енгізу бойынша жұмыстар жүргізілуде. Онда «лагерь» атауын «орталық» атауымен алмастыру мәселесі пысықталуда», – делінген деп хабарлайды ҚазАқпарат.
Осындайда классик жазушы Бердібек Соқпақбаевтың балалар лагеріне барған сапары еске түседі. Балалар ойларында ештеңе жоқ, атақты жазушыға: «Ата, сіз лагерьде болдыңыз ба?» деп сұрақ қойыпты. Сонда қаламгер: «Болдым, бірақ ол тұқымың құрғырдың аты жаман еді» деп айтқан екен.
