Конституциялық реформа – ел дамуының келесі кезеңін айқындайтын аса маңызды қадам. Осындай жауапты міндетті жүзеге асыру үшін құрылған Конституциялық реформа жөніндегі комиссияның құрамы оның алдына қойылған мақсаттың ауқымына толық сай келетінін көрсетеді.
Комиссия құрамына 120-дан астам азаматтың енуі – бұл жай ғана сандық көрсеткіш емес. Ең бастысы, оның сапалық құрамы ерекше назар аудартады. Мұнда заң ғылымының белді өкілдері, тәжірибелі конституционалистер (В.Малиновский, Л.Жақаева, Е.Дүйсенов, С.Ударцев және т.б.), Парламент депутаттары (А.Сарым, С.Пономарев, Н.Сәбильянов және т.б.), мемлекеттік басқару саласының кәсіби мамандары, бизнес қауымдастық, азаматтық сектор, медиа және сарапшылар қауымының өкілдері бір алаңда тоғысқан. Бұл – реформаның тек бір саланың немесе бір топтың мүддесіне емес, бүкіл қоғамның сұранысына негізделіп жүргізілетінің айқын дәлелі.
Комиссияның тағы бір маңызды ерекшелігі – оның теңгерімділігі. Құрамда елдің барлық өңірлерінен өкілдердің болуы өңірлік мүдделердің ескерілетінін білдіреді. Сонымен қатар гендерлік тепе-теңдік сақталып, әр салада өзін дәлелдеген білікті әйел мамандардың тартылуы қоғамдағы инклюзивтілік қағидаттарының іс жүзінде көрініс тапқанын аңғартады.
Комиссия мүшелерінің басым бөлігі заң шығару, қоғамдық басқару, сараптамалық және ғылыми қызмет салаларында мол тәжірибеге ие. Ал оны басқарып отырған мемлекеттік менеджерлердің практикалық білімі мен ұйымдастырушылық қабілеті көпқырлы пікірлерді бір арнаға тоғыстырып, нәтижелі шешімдер қабылдауға мүмкіндік беретіні сөзсіз.
Жалпы алғанда, Конституциялық реформа жөніндегі комиссияның құрамы – кәсібилік пен өкілділіктің, тәжірибе мен қоғамдық сенімнің үйлескен үлгісі. Мұндай құрам ел болашағы үшін айрықша мәнге ие реформаның сапалы, жан-жақты және уақытылы жүзеге асуына берік негіз қалайды.
Бибігүл Абдилова,
Ұйғыр аудандық мәслихатының депутаты
