20 қаңтар күні Қызылордада өткен Ұлттық құрылтайдың V отырысында Мемлекет басшысы Қасым-Жомарт Тоқаев елімізде мемлекетті басқару формасына ауқымды конституциялық реформа жасалатынын мәлімдеді. Президент реформа аясында қазіргі Парламенттің құрылымы мен құрамын, атауы толық өзгертуді ұсынды.
Жалпы, Қазақстанда жүзеге асырылып жатқан конституциялық реформа – мемлекеттілікті нығайтуға, басқару жүйесін заман талабына сай жетілдіруге бағытталған стратегиялық үдеріс. Осы тұрғыдан алғанда, Конституциялық реформа жөніндегі комиссияның құрылуы мен оның құрамы бұл бастаманың мазмұндық тереңдігін айқын көрсетеді.
Комиссияны Конституциялық сот төрағасының басқаруы – реформаның құқықтық негізге сүйеніп, институционалдық сабақтастықпен жүргізілетінінің маңызды белгісі. Бұл 2022 жылғы саяси жаңғырудың заңды жалғасы ретінде қабылданады.
Комиссия құрамының кең ауқымды әрі теңгерімді болуы ерекше назарға лайық. Онда мемлекет өкілдерімен қатар, өңірлердің мүддесін жеткізетін азаматтар, қоғамдық сектор, сарапшылар қауымы мен әртүрлі көзқарастағы кәсіби мамандар біріктірілген. Бұл – «Әділетті Қазақстан», «Еститін мемлекет», «Әртүрлі пікір – біртұтас ұлт» сияқты негізгі идеологиялық қағидаттардың нақты іске асуы.
Маңыздысы – бұл комиссия белгілі бір саяси немесе ведомстволық шеңберде қалып қоймай, қоғамның сан қырлы үнін естуге бағытталған ашық алаң ретінде құрылып отыр. Азаматтардың ұсыныстары мен пікірлері ескерілетін тетіктердің болуы реформаның қоғамдық легитимділігін күшейтеді.
Жалпы алғанда, Конституциялық реформа жөніндегі комиссияның құрамы – кәсібилік, өкілділік және қоғамдық сенім үйлесім тапқан құрылым. Мұндай негізде жүргізілетін реформа елдің ұзақ мерзімді дамуына қызмет етіп, Қазақстанның демократиялық жаңғыру жолын нығайта түсетініне сенім мол.
Қаныбек Айтжанов,
«Аманат» партиясы Қарасай аудандық филиалының төрағасы
