30 тамыздан бастап электр самокаттарға қатысты заң күшіне енеді. Енді жолда ереже бұзғандар әкімшілік жауапкершілікке тартылады.
Ішкі істер министрлігінің мәліметінше, биылғы бес ай ішінде республика бойынша самокатшылардың қатысуымен 10 жол апаты тіркелген. Бір адам қайтыс болып, 11 адам дене жарақатын алған.
Электр самокат тізгіндегендердің ессіз әрекеті қоғамда үлкен дау тудырды. Халық жүгенсіз кеткендерді жауапкершілікке тартуды талап етті. Осы мәселеге қатысты заң жобасы әзірленген болатын.
22 маусымда Сенат «Жол қозғалысы туралы» ҚР Заңының жаңа редакциясын мақұлдады. 29 маусымда Президент тиісті заңға қол қойды.
Жаңа заңда көрсетілгендей, енді самокатқа отырғандар мынаны ескеруге тиіс:
– электр самокаттардың жолдың жүріс бөлігінің оң жақ шетімен қозғалуына рұқсат етіледі;
– жүргізуші 18 жасқа толған болуы тиіс;
– көлік құралын басқаруға құқық беретін кез келген санаттағы жүргізуші куәлігі болуы шарт;
– шлем кию міндетті.
– қараңғы уақытта қозғалу кезінде басқа көлік құралдарының жүргізушілеріне көрінуі үшін жарық түсіретін белгілер орнатылуы қажет.
– тротуар немесе жаяу жүргіншілер жолымен сағатына 6 километрден аспайтын жылдамдықпен жүруі шарт.
Ережені бұзған жүргізушілер заң алдында жауапкершілікке тартылады.
