Жамбыл ауданының жер көлемі үлкен, елдімекендердің көбі бір-бірінен алыс орналасқан. Елдің шетінде, желдің өтінде отырған жұрттың жайы алдымен ойлантса керек, аудан әкімі Нұрлан Ертас халыққа жыл басындағы дәстүрлі есеп беруін шалғай ауылдардан бастады.
Алғашқы күндері қиыр қонып, шет жайлаған Күрті өңіріндегі Бозой, Айдарлы, Сарытауқұм ауылдық округтеріне сапарлады. Аудан орталығынан 130-150 шақырымдағы Бозой, Айдарлы, Ащысу, Қаншеңгел елдімекен тұрғындарымен кездесуге әкіммен бірге орынбасарлары, бөлім, мекеме басшылары, электр, су, байланыс сияқты өзге де қызметтердің жетекшілері барды. «Алматы – Астана» күрежолы тұсындағы жартылай шөлейтті аймақ тұрғындары негізінен мал және қауын-қарбыз өсіреді. Нұрлан Ертасұлы былтырғы жұмысты қорытындылап, ауданның әлеуметтік-экономикалық даму барысын, алдағы жоспарларды таныстырды. Аграрлы ауданда жыл өткен сайын мал басының өсуі, одан алынатын өнім түрлерінің көлемі мен сапасының артуы нақты мәліметтермен тарқатылды. Малдан түсетін табысты еселеу үшін өңдеу өнеркәсібі қажеттігі сөз етілді.
Жиында халыққа қызмет көрсету, әлеуметтік қолдау, білім және денсаулық сақтау салаларындағы оң өзгерістермен қоса аудан өмірінің барлық қыры толық қамтылды. Сонымен қатар мемлекеттік бағдарламалардың орындалу барысы сараланып, кейбір бағыт бойынша кемшіліктер де ашық айтылды. Тұрғындар тарапынан су, табиғи газ, жол, жарық, әлеуметтік нысандар құрылысына қатысты сұрақтар қойылды. Мәселен, Сарытауқұм ауылдық округі ақсақалдар алқасының төрағасы Сайын Байымбетов егістікке су жеткізу, балалар ойын алаңы мен спорт алаңын салу және шағын орталық ашу қажеттігін айтты.
Кездесуде Мемлекет басшысының саяси жаңғыру, Конституциялық реформалар және әділетті қоғам құру бағытындағы бастамаларына ерекше назар аударылды. Аудан әкімі Конституциялық өзгерістердің мәні мен маңызын, референдумға қатысты ақпараттық-түсіндіру жұмыстарының жүргізіліп жатқанын, әрбір азамат өзгерістің мәнін түсініп, белсенділік танытуы қажеттігін жеткізді.
Әкім сонау Балқаш көлі жағасында, аудан орталығы Ұзынағаштан 350 шақырымдай қашықта жатқан Үлкен ауылының халқымен де кездесті. Ондағы балық шаруашылығын басты кәсіп еткендер де атқарылған іске қанығып, шара барысында өзекті мәселелері мен ұсыныстарын білдірді. Тұрғындар тарапынан көтерілген сұрақтар назарға алынып, орындалуы бойынша нақты тапсырма берілді. Үлкен ауылында инфрақұрылымды жақсарту мақсатындағы жұмыстар оң нәтиже беруде. 2025 жылы ауылішілік жолдар жөнделіп, бірнеше көше жаңартылды. Ауылдық амбулатория құрылысы қарқынды жүріп, қазір аяқталуға жақын. Бұл – өңірдің әлеуметтік инфрақұрылымын жақсартуға бағытталған маңызды жобалардың бірі.
Халыққа есеп беру кездесулері үш аптаға созылып, 24 ауылдық округтің әкімшілік орталықтарында тұрғындармен жиындар өтуде. Жалпы Жамбыл ауданында үлкенді-кішілі 61 елдімекен бар. Аудан басшысы тұрақты кездесулерінде тұрғындармен ашық тілдесті. Жинақталған халықтың сұраныстары мен ұсыныстарының орындалуын үнемі назарында ұстайды.
Серік САТЫБАЛДИЕВ,
Жамбыл ауданы
