Облыс әкімі Балқаш өңіріне барды

Алматы облысында жаңа Конституцияның ережелерін түсіндіру бойынша ақпараттық жұмыс жалғасуда. Жұмыс сапары аясында Алматы облысының әкімі Марат Сұлтанғазиев Балқаш ауданында болып, Бақанас ауылындағы «Бірлік» ЖШС және аграрлық-индустриялық колледжінің ұжымдарымен кездесті.
Алғашқы нысан «Бірлік» агрофирмасы болды. Бұл – жүздеген жергілікті тұрғындар жұмыс істейтін өңірдің жетекші шаруашылықтарының бірі.
Кездесу барысында облыс әкімі әйелдер қауымын мерекемен құттықтап, олардың ауыл шаруашылығын дамытуға қосып жатқан баға жетпес үлесін атап өтті. Сондай-ақ кәсіпорын өнімдерімен танысып, алдағы референдум турасында сөз қозғады.
– Жаңа заң негізінде азаматтардың құқықтары толықтай қорғалады, кәсіпкерлік дамиды, қоғамда өзара сенім қалыптасады. Бұл өзгерістер біздің құқықтарымызды нығайтуға, ауыл шаруашылығы саласы мен қарапайым еңбекті қорғауға бағытталған маңызды қадам болып саналады, – деді облыс әкімі.
Бұдан соң кездесу Бақанас аграрлық-индустриялық колледжінде жалғасты. Бұл оқу орны 1977 жылдан бастап өңірге қажетті мамандар даярлап келеді. Өз сөзінде Марат Сұлтанғазиев жаңа Конституция – адами капиталды дамытудың жаңа стратегиясы екенін атап өтті. Онда білім беру жүйесі мен болашақ мамандар үшін маңызды авторлық құқықты, зияткерлік меншікті және цифрлық қауіпсіздікті қорғау тетіктері бар. Облыс әкімі жаңа Конституция жобасында тарихи мұра мен табиғи ресурстарды сақтау жауапкершілігі күшейтілгенін де жеткізді.
Жиын соңында алдағы 15 наурызда өтетін референдум ел үшін шешуші кезең болатынын айтып, аудан тұрғындарын осы саяси науқанға белсене қатысуға шақырды. Мұндай маңызды қадам еліміздің болашағы мен дамуына жарқын жол ашпақ.
Алма ЕСЕНБАЙ
Балқаш ауданы