Алматы облысында жаңа Конституцияны қолдауға арналған футбол матчында спорт пен өнер жұлдыздары кездесті

Қарасай ауданында жұлдыздар қатысқан ерекше шоу-матч өтті. Бірегей шараға 3000-нан астам көрермен жиналды. Спорт пен өнер саласының танымал өкілдері бір алаңда бас қосып, кімнің футболда мықты екенін анықтаудан гөрі, көрермендерге жарқын шоу ұсынып, көтеріңкі көңіл күй сыйлауды мақсат етті. Сонымен қатар олар спорттың әртүрлі саладағы адамдарды — чемпион спортшылар мен өнер иелерін — бір арнаға тоғыстыра алатынын көрсетті.
Іс-шара Алматы облысындағы «Әділетті әрі прогрессивті Қазақстанның Халықтық Конституциясы үшін» жалпыұлттық коалициясының өңірлік ұйымының қолдауымен, «Біз жаңа Конституцияны қолдаймыз» ұранымен ұйымдастырылды.
«Командалық ойындарда, өмірдегі сияқты, бірлік жеңіске жеткізеді. Бұл матч – тек спорт мерекесі ғана емес, сонымен бірге жаңа Конституция жөніндегі референдумды қолдайтынымыздың белгісі», – деді жаңа Конституцияны қолдау жөніндегі өңірлік коалицияның жетекшісі Қуат Байғожаев.
Футбол алаңында екі жарқын команда кездесті. «Қонаев» командасының сапында Париж Олимпиадасының грек-рим күресінен күміс жүлдегері Демеу Жадраев, Бейжің Олимпиадасының күміс жүлдегері Нұрбақыт Теңізбаев, Лондон Олимпиадасының қола жүлдегері Ақжүрек Танатаров, әлем чемпионаттарының жүлдегерлері Нұржан Жұмажан, Ербол Қоныратов, Қорлан Жақанша, айтыскер Сырым Әуесхан, Qonaev media телеарнасының жүргізушісі Қосқанат Көпжасар және басқа да қатысушылар өнер көрсетті.
Оларға қарсы «Алатау» жұлдызды командасы ойнады. Оның құрамында қазақстандық эстраданың танымал әншісі Жұбаныш Жексен, SuperStar KZ жобасының жеңімпазы, белгілі әнші Нұржан Керменбаев, елге кеңінен танымал кино және теледидар актері Тәуекел Мүслім, жастар арасында танымал блогер Азат Жұмаділ және басқа да медиа тұлғалар болды.
Матч тартысты әрі қызу атмосферада өтті. Қатысушылар жақсы физикалық дайындықтарын, үйлесімді командалық ойынды және нағыз спорттық жігерді көрсетті.
«Мен футболды жастайымнан жақсы көремін. Қазір де бұл спорт түрімен тұрақты түрде айналысамын. Жаттығу – дене шынықтыруды сақтаудың жақсы тәсілі. Осындай шаралар спорттың, салауатты өмір салтының және белсенді азаматтық ұстанымның маңызын тағы бір еске салады» – деді әсерімен бөліскен Тәуекел Мүслім.
Жолдастық кездесу 2:1 есебімен «Қонаев» командасының жеңісімен аяқталды. Матчтан кейін қонақтарға арналған концерттік бағдарлама ұйымдастырылып, мерекелік көңіл күйді одан әрі арттырып, көрермендерге ерекше әсер сыйлады.