Қонаев қаласындағы №947 сайлау учаскесінде таңсәріден алғашқы болып дауыс беруге келген жандарға арнайы сыйлық табысталды. Тұрғындар мен комиссия мүшелері Мемлекеттік Гимнді бірге шырқап, референдум ашық деп жарияланған сәттен бастап, өз таңдауын жасады.
– Мұндай акциялар тұрғындардың көңіл-күйін көтеріп, дауыс берушілердің белсенділігін арттырады. Учаскеге алғашқы болып келудің өзі маңызды кезеңге деген азаматтық жауапкершіліктің белгісі. Референдумға қатысу – ел болашағының берік болуына жасалған қадам. Әрбір жанның пікірі, азаматтық ұстанымы қоғам үшін үлкен маңызға ие.
Референдум Қазақстан Республикасының заңнамасына сәйкес ұйымдастырылып, өз деңгейінде өтуде. Учаске белгіленген уақытта ашылып, комиссия мүшелері өз жұмысын бастады. Қоғамдық тәртіп пен қауіпсіздік басты назарда. Дауыс берушілердің еркін таңдау жасауына барлық жағдай жасалған. Бақылаушылар мен БАҚ өкілдері референдум барысын ашық түрде қадағалауға мүмкіндік алып отыр, – дейді №947 сайлау учаскесінің комиссия төрағасы Гүлзат Тағанбаева.
Сыйлыққа ие болған жанның бірі –Нағайым Байжігітова. «Еліміз үшін маңызды сәтте өз дауысымды беруге келдім. Әрбір жан референдумға қатысып, таңдауын жасау керек деп есептеймін. Алғашқы болып келгенім үшін сыйлық та алдым. Өте қуаныштымын», – деді ол.
Гүлзат Байқонысова
