Бұл жолғы референдумда қолжетімді әрі инклюзивті орта қалыптастыруға ерекше мән берілген. Зағип және көзі нашар көретін дауыс берушілер үшін Брайль қарпімен терілген трафареттер мен ақпараттық стендтер әзірленді. Алматы облысы бойынша республикалық референдумға 694 комиссия өкілі жұмылдырылған. Соның 12-сі аумақтық, қалғаны учаскелік комиссия өкілдері. Олардың құрамында 4 800-ден аса комиссия мүшесі бар. Бүгінде 1 млн 30 мыңға жуық тұрғын референдумда дауыс беру құқығына ие. Осындай ауқымды саяси шараны байқаушыларсыз елестету мүмкін емес.
– Мен референдумға байқаушы ретінде қатысып отырмын. Байқаушының негізгі міндеті – дауыс беру процесінің ашық, заң талаптарына сәйкес өтуін қадағалау. Қазіргі уақытта учаскеде дауыс беру қалыпты жағдайда өтуде. Дауыс берушілер белсенді қатысып жатыр, барлық процедуралар заң талабына сәйкес жүргізілуде. Қонаев тұрғындары үшін де референдумның маңызы өте зор екенін дауыс беруге келіп жатқан азаматтарымыздың белсенді қатысуынан байқадым. Мен де зайырлы мемлекеттің азаматы ретінде сенім мен үміт арта отырып, жақсы көңіл-күймен референдумға қатысып, Қазақстанның өркендеуіне тамшыдай болса да, үлесімді қостым деп ойлаймын, – дейді Қонаев қаласындағы №947 референдум учаскесінің байқаушысы Жайна Сүлейменова.
Ерзат АСЫЛ,
Қонаев қаласы
