Райымбек ауданы Сарыбастау ауылында Раушан Нұрақынова есімді 103 жастағы қарт ана тұрады. Апамыздың жасы ғасырдан асса да әлі тың. Қимыл-қозғалысы ширақ. № 781 референдум учаскесіне өзі келіп, таңдауын жасады. Біз қарт ананы дауыс бергеннен кейін әңгімеге тартқан едік.
– Раушан апа, 103 жасыңызда ел тағдырына қатысты референдумға келуіңіз көпшілікке үлгі екені анық. Бұл күннің сіз үшін қандай маңызы бар?
– Балам, мен осы уақыт ішінде талай тар кезең, тайғақ кешуді бастан өткердім. Ел басына түскен қиындықтың да, қуаныштың да куәсі болдым. Сондықтан мемлекетіміздің болашағына қатысты әрбір шешімге бейжай қарай алмаймын. Референдум – халықтың өз ойы мен пікірін еркін білдіретін маңызды сәт. Сол үшін осы жерге келіп, дауыс беруді азаматтық парызым санаймын.
– Сіз Кеңестік дәуірді де, Тәуелсіз Қазақстанның қалыптасу кезеңін де көрдіңіз. Бүгінгі қоғамдағы өзгерістерге деген көзқарасыңыз қандай?
– Әр заманның өз заңы, өз талабы бар. Біз жас кезімізде елдің ертеңі қандай болатынын көп ойлаушы едік. Тәуелсіздік – халқымыздың ең үлкен бақыты. Енді сол тәуелсіздікті нығайту үшін заңымызды уақыт талабына сай жетілдіру керек деп ойлаймын.
– Әңгімеңізге рақмет!
Жұмабек Тәліпұлы
Райымбек ауданы
