Жамбыл Жабаевтың ұрпақтары республикалық референдумға қатысып, дауыс берді. Бүгін таңның атысымен Жамбыл ауданының Жамбыл ауылында ерекше рухты күн басталды. Ұлттық киім киген өнерпаздар мен батырлар, көкпаршылар ауылдың орталық көшесімен жүріп өтіп, ауылға мерекелік көңіл-күй сыйлады.
Жыр алыбы ұлы Жамбыл Жабаевтың тікелей ұрпағы Салтанат Жамбылова бастаған Жамбыл атаның ұрпақтары өздерінің сайлау учаскелеріне барып, республикалық референдумда дауыс берді. Ата дәстүрін ардақтап, елдік құндылықтарды жоғары қоятын Жамбыл ақынның ұрпақтары маңызды саяси науқанға белсенді қатысып, ел болашағына бей-жай қарамайтындарын көрсетті. Бірлігі жарасқан әулет ата аманатына адалдық танытып, ел тағдырына қатысты маңызды шешімдерге жауапкершілікпен қараудың өнегесін көрсетті.
Ақынның немересі, әрі Жамбыл музейінің меңгерушісі Салтанат Жамбылова бұл шараның маңызы туралы былай деді: «Бүгін еліміз үшін маңызды күн – Қазақстандағы Конституцияға өзгерістер енгізу жөніндегі референдум өтуде. Осындай тарихи сәтте біз, жыр алыбы Жамбыл Жабаев атамыздың ұрпақтары, оның музейіне келіп, рухына тағзым етуді жөн көрдік. Бұл күн тағы бір айтулы оқиғамен тұспа-тұс келіп отыр. Биыл Жамбыл атамыздың 180 жылдығы аталып өтуде. Халық даналығын жырмен жеткізген ұлы ақын ел бірлігі мен әділдікті, ынтымақ пен татулықты әрдайым жоғары қойған. Бүгінгі референдум да сол құндылықтарды нығайтып, еліміздің болашағын айқындайтын маңызды қадам. Әр азаматтың өз таңдауын жасап, ел тағдырына жауапкершілікпен қарауы – саналы қоғамның белгісі. Халқымыз аман, бірлігіміз бекем болсын!» – деді Салтанат Тезекбайқызы.
Ол өзі көршілес Сарыбай би ауылындағы Қарасу орта мектебінің ғимаратында орналасқан №300 референдум учаскесінде дауыс берді. Ал Жамбыл ұрпақтарының осы ауданда тұратындарының басым көпшілігі ақын ауылындағы № 296 учаскеде өз таңдауларын жасады.
Серік САТЫБАЛДИЕВ
Жамбыл ауданы
