Референдум күні Қонаев пен Алатау қалаларында экологиялық бағыттағы игі бастама – ағаш отырғызу акциясы ұйымдастырылды. Бұл шара тұрғындардың қоғамдық белсенділігін арттырумен қатар, қоршаған ортаны қорғау мен қаланы көгалдандыруға бағытталды.
Облыс орталығы Қонаев қаласындағы Б.Соқпақбаев атындағы орталық саябағында өткен акцияға қала тұрғындары, белсенді жастар мен түрлі ұйым өкілдері қатысты. Шара барысында саябақ аумағына 15 көшет егіліп, қаланың жасыл желегін көбейтуге үлес қосылды. Шара көктемнің жаңаруымен тұспа-тұс келген Наурыз мерекесінің мәнімен үндесіп, табиғатты қорғау мен қоршаған ортаны көркейтуге бағытталды. Сонымен қатар акция елімізде жүзеге асып жатқан «Таза Қазақстан» экологиялық бастамасын қолдауға арналды. Осы орайда Қонаев қалалық ішкі саясат бөлімінің басшысы Жеңіс Төребеков: «Бүгінгі акцияның басты мақсаты – қаламызды көгалдандырумен қатар, тұрғындардың табиғатқа деген жанашырлығын арттыру. Референдум күні ұйымдастырылған бұл шара азаматтарды бірлікке, ортақ іске үлес қосуға үндейді. Қаламыздың жасыл аймағын көбейту – баршамызға ортақ міндет, – деп бұл бастама тек табиғатты көгалдандыру ғана емес, сонымен бірге қоғамдағы жаңару мен оң өзгерістердің символы екенін тілге тиек етті.
Игі шара Алатау қаласында да жалғасын тапты. «Референдум аллеясында» тұрғындар мен еріктілер ағаш көшеттерін отырғызды. Алатау қаласының ішкі саясат бөлімі басшысы Ардагер Ақжігітовтің айтуынша, аталған акция қала аумағын көркейтіп қана қоймай, қоршаған ортаны қорғаудың жауапкершілігін арттырады. «Референдум аллеясында» қолға алынған игі іс – бүгінгі маңызды күннің символдық белгісі. Мұндай шаралар тұрғындарды табиғатты аялауға шақырып, қаламыздың көркін арттыра түсетіні анық, – деді Ардагер Өркенұлы. Акцияға қатысқан жастар қала тұрғындарын табиғатты аялауға және қоршаған ортаны таза ұстауға шақырды.
Құралбек Сәбитов
