Бірер күн бұрын әлеуметтік желі арқылы Талғар ауданына қарасты Еңбекші ауылында тұратын баланың бейнежазбасы тараған еді. Онда жас жеткіншек ауылында ойын алаңы жоқтығын айтып, «ел басқарушы ағалардан» балалар алаңқайын салып беруін өтінеді.
«Жаз өтіп бара жатыр. Бізде ойнайтын бір алаң жоқ. Жүрміз. Ойын алаңымыздың түрі мынау, шаңға бүркіп келеміз. Жабайылар секілді ойнаймыз. Қалаға барғымыз келеді. Қалаға 2 шақырым жол жүреміз. Өте қауіпті. Машиналар көп жүреді. Құрметті ел басқарушы ағалар! Мен президент болғанша көмектесіп, қолдағандарыңызды қалаймын”, – дейді балақай видеода.
Баланың бейнежазбасы әкімнің назарынан тыс қалмады. Бүгін аудан басшысы Таңат Айдарбеков осы видеоға байланысты мәлімдеме жасады. Айтуынша, аталған елдімекенге тұрғын үй-коммуналдық шаруашылығы бөлімінің мамандары барып, жағдаймен танысқан.
«Биыл демеушілердің қаржысына бір ойын алаңы салынады. Ал келесі жылы 3 алаң салу жоспарланып отыр», – деді аудан әкімі.
