Белсенділік таныту маңызды

Балқаш ауданы, Миялы ауылындағы №101 дауыс беру учаскесінде белгілі қоғам қайраткері Тынышбай Досымбеков референдумға қатысып, өз таңдауын жасады. Маңызды қоғамдық-саяси науқанға белсенді түрде қатысқан ол азаматтарды ел болашағына бейжай қарамауға шақырды.
Учаскеге келген Тынышбай Досымбеков дауыс беру рәсіміне қатысып, өз азаматтық борышын орындады. Оның айтуынша, референдум – елдің даму бағытын айқындайтын маңызды қадамдардың бірі. Сондықтан әрбір азамат мұндай тарихи сәтте белсенділік танытуы қажет.
– Бүгінгі референдум – ел өміріндегі маңызды саяси оқиға. Әрбір азамат өз таңдауын жасап, қоғамның дамуына үлес қосуы тиіс. Біз болашақ ұрпақтың игілігі үшін жауапты шешім қабылдайтын кезеңде тұрмыз, – деді ол.
Тынышбай Досымбекұлы тұрғындарды қоғамдық маңызы бар шараларға бейжай қарамай, өз құқықтарын пайдаланып, дауыс беруге шақырды. Оның пікірінше, халықтың белсенділігі елдегі демократиялық үдерістердің нығаюына ықпал етеді.
Айта кету керек, №101 референдум учаскесінде дауыс беру үдерісі талапқа сай ұйымдастырылып, сайлаушылар үшін барлық қажетті жағдай жасалған. Азаматтар кезек-кезегімен келіп, өз таңдауларын жасап жатыр. Балқаш ауданының Миялы ауылында 617 ден астам сайлаушы бар. Миялы секілді шағын ауылдарда референдумға қатысу әр адамның белсенді азаматтық ұстанымын көрсетеді және ауылдың, ауданның, тіпті бүкіл өңірдің болашағына әсер етеді.