Іле ауданында референдум күні ерекше акциялар ұйымдастырылды. Күрті ауылдық округіндегі №417 референдум учаскесінде өткен «Шұбат party» атты ерекше акцияда дауыс беру үшін келген тұрғындарға қазақ халқының ежелден келе жатқан дәстүрлі сусыны ұсынылды.
Табиғи әрі пайдалы бұл ұлттық сусын тұрғындарға тегін таратылып, учаскеде ерекше мерекелік көңіл-күй қалыптасты. Ұйымдастырушылардың айтуынша, мұндай бастама тұрғындардың көңілін көтеріп қана қоймай, ұлттық құндылықтарды дәріптеуге де бағытталған. Учаскеге келген азаматтар дауыс беру рәсімінен кейін бір-бірімен әңгімелесіп, шұбаттан дәм татып, ұйымдастырушыларға алғысын білдірді.
Ұлттық құндылықты ұлықтаған шараның бірі Асқар Тоқпанов ауылдық округінде жалғасын тапты. №42 мектеп ғимаратында орналасқан референдум учаскесіне келген тұрғындарға қазақтың ұлттық тағамы – ыстық бауырсақ таратылды. «Бауырсақ party» деп аталған шағын мерекелік шара дауыс беруге келген ауыл тұрғындарын бір ортаға біріктіріп, татулық пен ауызбіршіліктің көрінісіне айналды.
Референдум күні өңір учаскелерінің бірінде «Ана бейнесі» атты фотокөрме ұйымдастырылды. Көрмеде ананың мейірімі мен қоғамдағы рөлін бейнелейтін фотосуреттер мальберттерге орналастырылып, келушілер назарына ұсынылды. Дауыс беруге келген тұрғындар көрмені тамашалап, фотосуреттер арқылы анаға деген құрметті сезініп, отбасы құндылықтарының маңызына мән берді.
Іледегі игі шаралар референдум күні толассыз жалғасып жатты. Бірқатар учаске маңында «Денсаулық – зор байлық» атты медициналық акция ұйымдастырылды. Акция барысында медицина қызметкерлері тұрғындардың қан қысымын өлшеп, денсаулығын тексерді. Сонымен қатар азаматтарға скринингтік тексерулердің маңызы, аурулардың алдын алу жолдары және салауатты өмір салтын ұстану турасында ақпарат берді.
Боралдай кентінде тұрғындар үшін арнайы жеңілдіктер ұйымдастырылды. «Наурыз SALE» атты акция аясында кенттегі бірқатар ірі сауда орындары тауар бағаларын төмендетіп сатты. Акцияға Magnum, Toimart және басқа да дүкендер қосылып, азық-түлік пен күнделікті тұтынатын бірқатар тауарларға жеңілдік ұсынды. Бұл күн Өтеген батыр ауылының тұрғындары үшін учаскеге «Аңдар шаһары» мультфильмінің кейіпкерлері келуімен де есте қалды. Бұл, әсіресе, жастар үшін тосынсый болды.
Референдум барысында өңірдегі учаскелерде жағымды әсер қалыптасты. Бұл күн тұрғындардың басын біріктірген нағыз халықтық мерекеге айналды.
Ермұрат Мұқырбай
Іле ауданы
