Алматы көпсалалы клиникалық ауруханасында (АККА) дәрігерлер өміріне үлкен қауіп төндірген ауыр тамыр патологиясы бар 64 жастағы науқасқа күрделі жоғары технологиялық отаны сәтті жасады. Медициналық команданың жедел әрекеті мен заманауи емдеу әдістерін қолданудың арқасында науқастың өміріне төнген қауіптің алдын алып, жағдайын тұрақтандыру мүмкін болды.
Науқас ауруханаға жедел түрде, ауыр жағдайда жеткізілді. Тексеру барысында дәрігерлер жедел аорталық синдромды анықтады — құрсақ қолқасының инфрареналдық бөлімінде орналасқан, жарылу қаупі жоғары аневризма. Сонымен қатар, ішкі ағзалардың қанмен қамтамасыз етілуі бұзылып, мықын артерияларының тромбозы анықталды. Бұл өз кезегінде төменгі аяқтың сыни ишемиясына алып келген.
Науқастың өміріне жоғары қауіп төнгендіктен, шұғыл түрде дәрігерлер консилиумы өткізілді. Консилиум қорытындысы бойынша күрделі хирургиялық операция жасау туралы шешім қабылданды.
Операция барысында мамандар құрсақ қолқасының аневризмасын алып тастап, аорто-бедренді бифуркациялық шунттау жүргізді. Операция VUPMEDICAL 18:9:9 тамырлық аллопротезін қолдану арқылы жүзеге асырылды. Хирургиялық араласу реаниматологтар командасының қатысуымен өтті, бұл емдеу процесінің барлық кезеңінде науқастың жағдайын толық бақылауда ұстауға мүмкіндік берді.
Дәрігерлердің жоғары кәсібилігі мен медициналық команданың үйлесімді жұмысының арқасында аневризманың жарылуының алдын алып, науқастың өмірін сақтап қалу мүмкін болды. Операциядан кейінгі кезең тұрақты өтіп, екі аптадан кейін науқас қанағаттанарлық жағдайда үйіне шығарылды.
Айта кету керек, барлық тексерулер, операция және емдеу Міндетті әлеуметтік медициналық сақтандыру (МӘМС) жүйесі аясында жүргізілді.
Басқарушы компанияның бас директоры Жұмағали Исмаилов:
«Мұндай күрделі клиникалық жағдайларда дәрігерлердің жоғары біліктілігі, заманауи технологиялар және үйлесімді командалық жұмыс ерекше маңызды. Біздің мамандар күн сайын науқастардың өмірін сақтап қалу үшін жауапты шешімдер қабылдайды. Әрбір азамат сапалы әрі уақтылы медициналық көмек алуы үшін біз бар күшімізді саламыз».
Бұл клиникалық жағдай АККА дәрігерлерінің жоғары кәсібилігін және заманауи тамыр хирургиясының мүмкіндіктерін тағы бір рет дәлелдейді. Қазіргі медициналық технологиялардың арқасында ең күрделі әрі қауіпті жағдайларда да науқастардың өмірін сақтап қалуға мүмкіндік бар.
