Алматы облысы бойынша Сауда және тұтынушылардың құқықтарын қорғау департаментіне азаматтардан түсетін арыз-шағымдарды қарау барысында кезекті оң нәтиже тіркелді. Бұл жолы мәселенің өзегі – құны жоғары үй кинотеатры жиынтығын сатып алу барысында туындаған келеңсіздік болды.
Тұтынушы мамандандырылған дүкеннен 625 500 теңге сомасына заманауи аудио-видео жүйесін сатып алған. Алайда, тауарды пайдаланудың алғашқы күндерінде-ақ техникалық ақаулар анықталып, құрылғының дыбыс беру және кескін сапасы өндіруші мәлімдеген сипаттамаларға сәйкес келмейтіні белгілі болды.
Тұтынушы заңды құқығын пайдалана отырып, сатушыға тауарды тиісті сападағы баламасына ауыстыру немесе төленген қаражатты толық қайтару туралы талап қойған. Өкінішке орай, кәсіпкер заңды талаптарды орындаудан бас тартып, мәселені шешуді созбаққа салған.
Өз құқығының тапталғанын түсінген азамат мемлекеттік органның көмегіне жүгінді. Өтінішті қарау барысында Департамент мамандары «Тұтынушылардың құқықтарын қорғау туралы» ҚР Заңының бірнеше маңызды талаптарына сүйенді:
- 15-бапқа сәйкес: Тұтынушыға сапасы тиісті емес тауар сатылған жағдайда, ол өз қалауы бойынша тауарды ауыстыруды, сатып алу бағасын тиісінше төмендетуді немесе шартты бұзып, тауар үшін төленген ақшалай соманы қайтаруды талап етуге құқылы.
- 30-баптың талаптары: Сатушы (дайындаушы) сапасы тиісті емес тауарды қайтару немесе айырбастау туралы талап қойылған сәттен бастап, тұтынушының талаптарын қанағаттандыруға міндетті.
Департамент мамандары өтінішті қарау барысында осы заң нормаларын және міндеттемелерді орындамаған жағдайда қарастырылатын әкімшілік жауапкершілік туралы егжей-тегжейлі түсіндіру жұмыстарын жүргізді.
Жүргізілген жүйелі жұмыстар мен құқықтық кеңестердің нәтижесінде кәсіпкер өз қателігін мойындады. Дау сотқа дейінгі тәртіппен шешіліп, тұтынушыға 625 500 теңге көлеміндегі қаражаты толық көлемде қайтарылды.
«Бұл жағдай әрбір азаматтың өз құқығын білуі мен оны қорғау жолындағы белсенділігінің маңыздылығын тағы бір мәрте дәлелдейді. Заңның 7-бабына сәйкес, әрбір тұтынушының өз құқықтары мен заңды мүдделерін қорғауға құқығы бар, ал біздің міндетіміз – осы құқықтың іс жүзінде орындалуын қамтамасыз ету», – деп атап өтті Департамент өкілдері.
Алматы облысы бойынша Сауда және тұтынушылардың құқықтарын қорғау департаменті азаматтарды қандай да бір құқық бұзушылықтар орын алған жағдайда ресми түрде хабарласуға шақырады. Жүйелі бақылау және құқықтық қолдау жұмыстары алдағы уақытта да жалғасын таба бермек.
Д.Сенбаева
ҚР Сауда және интеграция министрлігінің
Алматы облысы бойынша сауда және
тұтынушылардың құқықтарын қорғау
департаментінің бас маманы
