«Таза Қазақстан» жалпыұлттық экологиялық акциясы аясында Кеген ауданы орталығындағы «Жастар» саябағында «Таза ауыл» ағаш егу шарасы өтті. Оған аудан әкімі Нұрбақыт Теңізбаев, аудан прокуроры Алмат Данилов, ақсақалдар алқасының төрағасы Шыңғыс Тұрсынов, ардагер-журналист Жақыпжан Нұрғожаев, мекеме басшылары және аудан тұрғындары қатысты.
Бұл шараның негізгі мақсаты – табиғатқа деген сүйіспеншілікті ояту, экологиялық мәдениетті қалыптастыру және белсенді өмір салтын насихаттау.
Акция аясында 3425 мың ағаш отырғызылды. Атап айтқанда, шренка шыршасы, терек, қайың ағашы егілді. Бұл жергілікті флораны қалпына келтіруге, биоәртүрлілікті арттыруға, болашақта тұрақты және сау экожүйені құруға мүмкіндік ашады.
Акцияның ашылу салтанатында құттықтау сөз сөйлеген аудан әкімі Нұрбақыт Теңізбаев:
– Бұл шара экологиялық мәдениетіміз бен қоршаған ортаға деген сүйіспеншілігімізді арттыруға негіз болады. Табиғатты сақтау – баршамыздың ортақ міндетіміз. Бұл акцияда біз табиғаттың жанашырлары ретінде оны аялауға, қоршаған ортаны таза ұстауға атсалысамыз. Табиғатты қорғау тек сөзбен емес, нақты ісәрекетпен жүзеге асуы тиіс. Сондықтан бүгінгі акцияда табиғатқа деген сүйіспеншілігімізді, қамқорлығымызды әрі жауапкершілігімізді көрсетуіміз керек, – дей келе, қазіргі таңда экологиялық мәселелер әлемдік деңгейде өзекті болып тұрғанын, осындай игі шаралардың оны шешуге аз да болса үлес қосатынын тілге тиек етті.
Бұдан соң сөз алған аудан прокуроры Алмат Данилов, аудандық ақсақалдар алқасының төрағасы Шыңғыс Тұрсынов бұл ісшара табиғаттың сұлулығын сезінуде, қоршаған ортаға деген сүйіспеншілікті арттыруда, белсенді өмір салтын насихаттауда маңызды болып табылатынын айтып өтті.
Акция концерттік бағдарламамен жалғасып, шара соңы орталық саябақ аумағын көгалдандыру мақсатында шырша көшеттерін отырғызумен түйінделді.
Табиғатты ластамау, қоқыс тастамау, көгалдандыру жұмыстарын тұрақты түрде жүргізу, өзенкөлдердің жағалауын таза ұстау, балаларға экологиялық тәрбие беру – осы ізгілікті істің бір парасы.
Акция аясында Кеген ауданы аумағында абаттандыру және көгалдандыру жұмыстары кезең-кезеңімен жалғасатын болады.
Дәурен ӘБУТӘЛІПОВ
Кеген ауданы
