Қонаевта масаларға қарсы дезинсекция және жасыл желектерді зиянкестерден қорғау жұмыстары жүріп жатыр. Іс-шаралар қалалық әкімдіктің тұрғын үй-коммуналдық шаруашылық бөлімі тарапынан ұйымдастырылуда.
Мамандардың айтуынша, 15 сәуірден 16 сәуірге қараған түні қамыс алқаптары өңделді. Алдағы уақытта бұл жұмыстар қала ішіндегі аумақтарда жалғасады.
Өңдеу барысында Қазақстанда қолдануға рұқсат етілген, қауіптілігі төмен препараттар пайдаланылады. Олар қоршаған ортаға, адамдар мен жануарларға зиянсыз. Дегенмен, препараттардың өзіне тән иісі болғандықтан, тұрғындарға өңдеу кезінде терезелер мен есіктерді жауып қою ұсынылады.
«Алдымен су айдындарына жақын аумақтар өңделуде. Содан соң қала ішіндегі учаскелер қамтылады. Жұмыстар белгіленген кестеге сәйкес жүргізіледі», – деді ТҮКШ бөлімі басшысының міндетін атқарушы Мадияр Зәкеров.
Ресми мәліметке сәйкес, дезинсекция жұмыстары бір апта жүргізіледі. Күз айларына дейін бірнеше кезеңді қамту жоспарлануда. Сонымен қатар, санитариялық-эпидемиологиялық бақылау басқармасы қыркүйек айына дейін безгек масасына қарсы өңдеуді 6 кезең бойынша жалғастырады.
