Қонаев қаласында көктемнің ең жарқын әрі шабыт сыйлаған спорттық оқиғаларының бірі – Қазақстан халқының бірлігі күніне орай ұйымдастырылған «Бірлік жүгірісі – 2026» облыстық жеңіл атлетикалық жарысы өтті. Бұл күн дәстүрлі түрде елдегі барлық этностардың достығын, келісімі мен өзара құрметін білдіреді, ал спорттық формат оған ерекше серпін мен қуат береді.
Таңғы уақыттан бастап облыс орталығы мерекелік атмосфераға бөленді: музыка, тулар, қатысушылардың жүзіндегі күлкі мен жанкүйерлердің қолдауы шынайы бірлік алаңын қалыптастырды. 400-ден астам адам стартқа шығып, 5 шақырым қашықтықты еңсерді. Жарыс бағыты қаланың негізгі көшелері – С. Сейфуллин және Д. Қонаев көшелері арқылы өтті.
«Бірлік жүгірісі» – жыл сайын танымалдылығы артып келе жатқан ауқымды республикалық бастаманың бір бөлігі. Жоба тарихы тәуелсіз Қазақстандағы бұқаралық спортты дамыту кезеңімен тығыз байланысты, онда қоғамдық денсаулықты нығайту мен белсенді өмір салтын қалыптастыруға ерекше мән беріледі.
«Бұл дәстүрлі спорттық іс-шара жасына, мамандығына және өмірлік тәжірибесіне қарамастан адамдарды біріктіре алатын спорттың айқын үлгісіне айналды. Жыл сайын бұқаралық жүгіру жарыстарына қызығушылықтың артып келе жатқанын көріп отырмыз. Адамдар отбасымен, достарымен, ұжым болып келеді. Бұл – қоғамды біріктірудің қуатты құралы. «Бірлік жүгірісінің» басты идеясы да осы» – деп атап өтті Алматы облысы дене шынықтыру және спорт басқармасының спорт инфрақұрылымын дамыту, ұлттық және бұқаралық спорт түрлері бөлімінің басшысы Дулатбек Құсбеков.
Қатысушылар жасына қарай 18-ден 35 жасқа дейін және 35 жастан жоғары санаттағы деп деп бөлінді. Барлығын алға жетелеген басты күш – қозғалыс пен өзін-өзі дамытуға деген ортақ ұмтылыс болды.
«Мен мұндай жарыстарға бірнеше жылдан бері қатысып келемін. Бұл – өзіңді сынап көруге және үлкен мерекенің бір бөлігі екеніңді сезінуге тамаша мүмкіндік. Осындай іс-шаралар спортпен айналысуды жалғастыруға шабыт береді» – деді жарыстың ең жасы үлкен қатысушысы Арнұр Ғаббасов. Қонаев қаласының тұрғыны, салауатты өмір салтын ұстанушы азамат бір айдан кейін 63 жасқа толады.
Ал ең жас қатысушы – 12 жастағы Бақыт Ерасыл болды. Райымбек ауданындағы спорт мектебінің жеңіл атлетика бөлімінің тәрбиеленушісі алғаш рет ересектер санатында бақ сынап, сәтті өнер көрсетті – ерлер арасында абсолюттік есепте үздік ондыққа енді.
«18–35 жас аралығындағы ерлер арасында үздік ондыққа кіру – мен үшін үлкен мақтаныш. Енді одан әрі көп жаттығып, бір күні осындай жарыста жеңіске жеткім келеді!» – деді Бақыт Ерасыл.
«Бірлік жүгірісі – 2026» тек спорттық жарыс қана емес, әрбір қадам алға – дені сау, мықты әрі біртұтас қоғамға қарай жасалған қадамды білдіретін нағыз бірлік мерекесіне айналды.
18–35 жас санатындағы ерлер арасында жеңімпаз атанған – Райымбек ауданының тұрғыны Ілияс Қайсар.
«Бұл жеңіс – табанды жаттығудың нәтижесі. Бірақ бүгін ең бастысы – бірінші орын емес, ерекше атмосфера болды. Жүгіру барысында адамдардың қолдауын сезініп, ерекше энергия аласың. Бұл шын мәнінде біріктіреді», – деп өз әсерімен бөлісті Ілияс Қайсар.
35 жастан жоғары ерлер арасында Қонаев қаласының тұрғыны Ардақ Қожахметов чемпион атанды.
Ал әйелдер арасында 18–35 жас санатында ең жылдам нәтиже көрсеткен – Еңбекшіқазақ ауданының өкілі Анастасия Михайлева. Үлкен жас санатында Қонаев қаласының тұрғыны Мөлдір Ержанова жеңіске жетті.
Жарыс жоғары деңгейде ұйымдастырылды: үйлестіру, қауіпсіз маршрут және еріктілердің қолдауы әр қатысушы үшін қолайлы жағдай жасады.
Іс-шараны Алматы облысының дене шынықтыру және спорт басқармасы облыстық «Бұқаралық спорт клубымен» бірлесіп ұйымдастырды.
