Қазақстан Халқының бірлігі күні Жамбыл ауданының Қарғалы ауылында да өзіне тән сән-салтанатпен аталып өтті. Бүгінде 41 мың тұрғыны бар Қарғалы – өңірдегі көне елдімекеннің бірі. Оның тарихы тым тереңде жатыр.
Ауылдың орталық алаңында өткен мерекелік шараға адам көп жиналды. Қарғалы ауылдық округінің әкімі Қуаныш Нәметов көпшілікті мерекемен құттықтап, мемлекеттің қарыштап дамуы үшін ынтымақ пен бірліктің, түсіністік пен татулықтың маңызына тоқталды. Сондай-ақ қарғалылықтарға ауылдық ақсақалдар кеңесінің төрағасы Шәріпбек Уағызұлы және Жамбыл ауданының Құрметті азаматы Исмаилжан Иминов ізгі тілектерін арнады. Олар өздерінің құттықтау сөздерінде Қарғалы ауылының тұрғындары бұрыннан қонақжай екенін, мұнда сан ұлттың өкілі тату-тәтті өмір сүріп келетінін атап өтті. Қазақ, орыс, ұйғыр, түрік және басқа да ұлт өкілдері аймақтың әлеуметтік-экономикалық дамуына өз үлестерін қосып келеді. Арасында облыс, республика көлемінде еңбегімен танылған жерлестері барын мақтан тұтады. Халық ақыны Үмбетәлі Кәрібаев, композитор Әсет Бейсеуов, ғарышкер Талғат Мұсабаев, ұлағатты ұстаз Құдыс Әбсәметов сияқты тұлғалардың кіндік қаны тамған киелі мекен бүгінде іргесі кеңейіп, халқының саны еселеп артып отырған ауылдың бірі.
Шараға жиналғандар Қарғалы №3 орта мектебінің өнерлі мұғалімдері мен оқушыларынан құралған өнерпаздардың мерекелік концертін тамашалады.
Серік САТЫБАЛДИЕВ
Жамбыл ауданы
