Жеңіс күніне орай Талғар қаласындағы «Жеңіс» саябағында салтанатты шара өтті. Мерекелік шара барысында Ұлы Отан соғысы жылдарында ел тәуелсіздігі мен бейбіт өмір жолында жанқиярлық ерлік көрсеткен майдангерлер рухына тағзым етіліп, ескерткішке гүл шоқтары қойылды. Қан майданнан қайтпаған қаһармандарды еске алып, бір минут үнсіздік жарияланды.
Мерекеге арналған салтанатты жиында жиналған жұртты аудан әкімі Таңат Айдарбеков Жеңіс күнімен құттықтады.
– Бұл – ерлік пен елдіктің, қайсарлық пен қаһармандықтың мерекесі. Ұлы Отан соғысында елімізді қорғап, бейбіт өмір үшін жанын қиған батыр бабаларымыздың ерлігі мәңгілік тағзымға лайық, – деді Таңат Айдарбеков.
Шара барысында «Әжелер шуағы» ансамблі, халықтық ардагерлер хоры және Мәдениет үйінің өнерпаздары соғыс жылдарындағы рухты әндерді шырқады. Сондай-ақ ауданның орталық көшелерінде бірнеше сағатқа көлік қозғалысы тоқтатылып, дәстүрге айналған велошеру өтті.
«Ерлік – елге мұра, ұрпаққа үлгі» дейді дана халқымыз. Ұлы Жеңіске өлшеусіз үлес қосып, біздің бүгін азат та бейбіт ел болуымыздың негізін қалаған батыр аталарымыздың ерлігі ешқашан ұмытылмайды. Ол – ұрпақтан-ұрпаққа жалғасатын мәңгі мұра, өшпес үлгі!
Құтмағамбет ҚОНЫСБАЙ
Талғар ауданы
