Осыдан 81 жыл бұрын жеңіс жалауы желбіреген еді. Елімізді қанға бөктірген, аналардың көз жасын төктірген, баланы жтім, ананы жесір еткізген Ұлы Отан соғысының соңғы оты осы күні сөніп еді. Содан бері 81 жыл. 81 жыл бойы сол сұм соғыста жандарын берген боздақтардың рухына тағзым, аман-есен елге келген солдаттарға құрмет көрсетіліп келеді бұл күні.
9 мамыр күні Ұйғыр ауданының тұрғындары да жеңіс күнін ерекше салтанатпен атап өтті. Ең әуелі аудан орталығы Шонжы ауылындағы Ұлы Отан соғысы ардагерлеріне арналған ескерткішке гүл шоқтарын қойды. От пен оқтың ортасында опат болған сарбаздардың рухына тағзым жасалды. Олар сыйлаған бейіт күн үшін бүгінгі ұрпақтары өз алғыстарын осылай көрсетті.
Бұдан соң Ұлы Отан соғысы ардагерлеріне арналған ескерткіш алаңында Ұлы Жеңістің 81 жылдығына арналған «Жеңіс жалауы желбіреген күн…» атты еске алу шарасы өтті. Аудан әкімі Бота Елеусізова сөз сөйлеп, Ұлы Жеңістің тарихи маңызына тоқталып, бұл күн ұрпақ жадында мәңгі қалуы қажеттігін атап өтті. Сонымен қтар бұл күнді тек мереке емес, майдангерлердің ерлігі мен қайсарлығы жайында тағылымды олар айтылып, олардың ерлік рухы алдында тағзым жасалуы тиіс күн екенін де ескертті. Жанын беріп, майдан даласында өмірін болашағы үшін құрбан еткен майдангерлердің қай-қайсысының болмасын ерлігі жадымыздан кетпеуі керек дегенді де айта кетті.
9 мамыр Ұлы Жеңіс мерекесіне орай ауданымыздағы жалғыз соғыс куәгері Алим ата Кебировқа құрмет көрсетіп, үйіне келушілер саны көп болды. Аудандағы мекемелер мен білім бөлімі тарапынан атамызға арнайы сый-сияпаттарын табыстап, ерлік пен өрліктің үлгісін көрсеткен жауынгерге алғыстарын айтты.
Анар Дүйсенбайқызы
