Көктем шығып, күн райы жылына салысымен Балқаш ауданының диқандары дала жұмыстарына белсене кірісті. Биылғы егін науқанына тыңғылықты дайындалған шаруалар жер жыртып, дән себуді жүйелі түрде жүргізуде. Әсіресе күріш егу науқаны мамыр айының алғашқы күндерінен бастап қарқын алып, егіс алқаптары қызу еңбек алаңына айналды.
Аудан бойынша биыл 5800 гектар суармалы жерге күріш егу жоспарланған. Қазіргі таңда соның 800 гектарына күріш себіліп, 475 гектар алқап суға бастырылған. Балқаш аудандық ауылшаруашылық саласының мамандары берген мәліметке сәйкес, көктемгі науқанды уақытылы әрі сапалы өткізу мақсатында мемлекет тарапынан 586,8 тонна арзандатылған жанар-жағармай бөлінген.
Бүгінде аудан көлемінде күріш егуді табысты ұйымдастырып отырған шаруашылықтардың қатарында «Агрофирма «Бірлік», «Динара», «Арслан Агро» жауапкершілігі шектеулі серіктестіктері мен «Марат» шаруа қожалығы бар.
Науқан барысымен танысу мақсатында біз «Агрофирма «Бірлік» ЖШС-ның егіс алқабына барып қайттық. Аталған шаруашылық биыл 1157 гектар жерге күріш егуді жоспарлаған. Қазіргі уақытта оның 300 гектарына дән сіңіріліп, 250 гектары суарылған. Сонымен қатар ерте көктемде 1000 гектар жерге бидай, 300 гектарға арпа егілген. Бұдан бөлек, шаруашылықтың 2800 гектар алқабында көпжылдық жоңышқа өсірілуде.
Шаруашылық басшысы Алмас Қыстаубаевтың айтуынша, көктемгі дала жұмыстарына сегіз «ДТ-75», отыз «МТЗ-80», он төрт «МТЗ-1221» және «YTO-1304» тракторлары жұмылдырылған. Сондай-ақ жиырма соқа мен сегіз тұқым сепкіш техника пайдаланылып, 100 адам тұрақты жұмыспен қамтылып отыр.
Таңның атысынан күннің батысына дейін еңбек етіп жүрген диқандардың жұмысы – тынымсыз еңбек пен төзімді талап ететін іс. Дала төсін дүбірге бөлеген еңбек адамдарының маңдай тері мол өнімнің негізі екені сөзсіз. Сондықтан олардың еңбегі жемісті болып, биылғы егін бітік шықсын деген ақжарма тілек әр адамның көңілінен орын алары анық.
Алтынай СЕЙІТКЕН
Балқаш ауданы