Қарасай ауданындағы «Үшқоңыр» спорт кешенінде Алматы облысы мемлекеттік қызметшілері арасындағы XVIII спартакиада басталды. Ауқымды спорттық іс-шара өңірдің барлық аудан-қалаларынан келген жергілікті атқарушы органдардың, әкімдік аппараттарының және күштік құрылымдардың өкілдерінен құралған командаларды бір алаңға тоғыстырды. Биылғы жарыста 21 құрама команда бақ сынаса, қатысушылардың жалпы саны 600 адамнан асты.
Салтанатты ашылу рәсімінде құрметті қонақтар сөз сөйлеп, кешенді жарыстың маңыздылығына ерекше тоқталды.
«Бүгінде мемлекеттік қызметші – өз ісінің кәсіби маманы ғана емес, сонымен қатар жоғары ішкі тәртіпке ие, ортақ нәтижеге ұмтылатын және белсенді өмірлік ұстанымы бар тұлға. Спорт дәл осындай қасиеттерді қалыптастырады. Бұл спартакиада – бірлік пен достықтың, өзара сыйластықтың жарқын алаңы» – деді Қазақстан Республикасы Мемлекеттік қызмет істері агенттігінің Алматы облысы бойынша департаменті басшысының орынбасары Мадияр Исебаев.
Мемлекеттік қызметшілер бірнеше күн жұмыс кабинеттерін спорт алаңдарына алмастырып, өздерінің спорттық мінезін, рух күшін, төзімділігі мен салауатты өмір салтына деген ұмтылысын көрсетуде.
«Спартакиада – облыс мемлекеттік қызметшілері үшін жыл сайынғы ең басты спорттық дода. Мұнда күн сайын өңір тұрғындарының игілігі үшін еңбек етіп жүрген азаматтар жиналып, белсенді әрі салауатты өмір салтының үлгісін көрсетуде. Сонымен қатар бұл жарыстың нақты мақсаты бар – шілде айында Көкшетау қаласында өтетін республикалық спартакиадаға қатысатын Алматы облысының құрама командасын жасақтау» – деп атап өтті Алматы облысы дене шынықтыру және спорт басқармасы басшысының орынбасары Жансерік Әдиахметов.
Ашылу рәсімінен кейін бірден іріктеу жарыстары басталды. Бәсеке тоғыз спорт түрі бойынша өтіп жатыр және олардың әрқайсысы ерекше дайындық пен шеберлікті талап етеді.
Футзал – бағдарламаның ең бұқаралық әрі тартысты спорт түрлерінің бірі. Алаңда командалар жылдам шешім қабылдау, өзара түсіністік пен шапшаң әрекет ету қабілеттерін көрсетуде.
Волейбол жарыстарында да тартыс жоғары деңгейде өрбіп, жеңіс командалық үйлесім мен әр ойыншының дәлдігіне байланысты болуда.
Баскетболдың 3х3 түрінде спортшылар шабуылға толы қарқынды ойын өрнегін көрсетіп, әрбір қателік матч тағдырын шешуі мүмкін екенін дәлелдеуде.
Үстел теннисінде қатысушылар реакция жылдамдығы, зейін және тактикалық ойлау қабілеті бойынша сынға түссе, жүзу жарыстарында секундтың жүзден бір бөлігіне дейінгі нәтижелер шешуші рөл атқаруда.
Бағдарламаның зияткерлік бөлігін шахмат пен тоғызқұмалақ құрайды. Мұнда қатысушылардан терең талдау, сабырлылық және қарсыласының әрекетін бірнеше қадам алға болжай білу талап етіледі.
Көрермендердің ерекше қызығушылығын қазақ күресі жарыстары тудырды. Бес салмақ дәрежесінде балуандар ұлттық спорттың үздік дәстүрлерін паш етіп, күш пен шеберліктің үлгісін көрсетуде.
Бағдарламаға сондай-ақ соңғы жылдары кең танымалдыққа ие болып келе жатқан киберспорт енгізілді. Оның жарыс түрлері қатарына қосылуы ұйымдастырушылардың заман ағымына сай дамып, мемлекеттік қызметшілердің заманауи спорт бағыттарына қызығушылығын қолдайтынын көрсетеді.
Бүгінде спартакиада – жай ғана спорттық жарыс емес. Бұл жыл сайын облыстың түкпір-түкпірінен келген әріптестердің басын қосатын, жарқын әсерлер сыйлайтын, жаңа таныстықтарға жол ашатын және жаңа жетістіктерге жігерлендіретін игі дәстүрге айналған маңызды іс-шара.
«Бұл жарыстарға алдын ала дайындалдық. Біз үшін бұл – спорттық қабілетімізді көрсетуге әрі әріптестермен бейресми жағдайда кездесуге тамаша мүмкіндік. Осындай шаралар адамдарды жақындастырады. Мұнда салауатты бәсекелестік рухы ерекше сезіледі. Әрине, әркім жеңіске ұмтылады, бірақ ең бастысы – қарым-қатынас пен көтеріңкі көңіл-күй» – деді жарысқа қатысушы Бауыржан Смағұлов.
Екі күнге созылатын жарыс қорытындысы бойынша облыстың үздік командалары анықталады. Жеңімпаздар мен жүлдегерлер кубоктармен, медальдармен, дипломдармен және ақшалай сыйлықтармен марапатталады. Спартакиаданың салтанатты жабылу және марапаттау рәсімі 13 маусым күні өтеді.