Қоғамның қауіпсіздігі мен тұрақтылығы әрбір азаматтың заңға деген құрметінен басталады. Заң талаптарының орындалуы адамдардың құқықтарын қорғап қана қоймай, елдің дамуына, қоғамдық келісімнің нығаюына және тұрғындардың өмір сүру сапасының артуына ықпал етеді.
Бүгінгі күні құқықтық мемлекет құру жолында заң мен тәртіп қағидаты ерекше маңызға ие. Әрбір азамат өз құқықтарын біліп қана қоймай, өз міндеттерін де жауапкершілікпен орындауы қажет. Өйткені заңды сақтау – қоғам алдындағы ортақ міндет.
Алатау қаласында қоғамдық тәртіпті сақтау және құқық бұзушылықтың алдын алу бағытында бірқатар жұмыстар жүзеге асырылуда. Қала тұрғындары арасында құқықтық түсіндіру шаралары ұйымдастырылып, жастармен, еңбек ұжымдарымен және қоғамдық ұйымдармен кездесулер өткізілуде. Мұндай шаралардың негізгі мақсаты – заңға бағынатын, жауапкершілігі жоғары қоғам қалыптастыру.
Әсіресе, интернет алаяқтық, тұрмыстық құқық бұзушылықтар, қоғамдық орындардағы тәртіп мәселелері бойынша тұрғындардың құқықтық сауаттылығын арттыруға басымдық берілуде. Себебі құқық бұзушылықтың алдын алудың ең тиімді жолы – азаматтардың құқықтық мәдениетін көтеру.
Тәртіп пен жауапкершілік орныққан қоғамда өзара сенім артып, қауіпсіз орта қалыптасады. Сондықтан әрбір тұрғын заң талаптарын сақтап, қоғамдық тәртіпке бейжай қарамауы тиіс.
Заңға бағыну – өркениетті қоғамның белгісі. Ал заң мен тәртіпті сақтау арқылы біз қауіпсіз, әділетті және дамыған мемлекет құруға өз үлесімізді қосамыз.