Жол қозғалысы ережесін сақтау – жүргізушінің ғана емес, көлік қозғалысына қатысатын әр адамның міндеті. Бір ғана ережені елемеу адам өміріне қауіп төндіруі мүмкін.
Жол-көлік оқиғаларының алдын алуда жүргізушілердің жауапкершілігі ерекше. Жылдамдықты шамадан тыс арттырмау, көлік жүргізу кезінде телефонға алаңдамау, жол белгілерін сақтау және жаяу жүргіншілерге жол беру – қауіпсіздіктің негізгі талаптары.
Ал жаяу жүргіншілер де жол қозғалысының толыққанды қатысушысы екенін ұмытпауы керек. Белгіленбеген жерден жолдан өту, бағдаршам талабын елемеу немесе құлаққаппен телефонға алаңдау – қайғылы жағдайға әкелуі мүмкін.
Балалардың жол қауіпсіздігіне де ерекше көңіл бөлген жөн. Ата-ана баласына жолдан өту ережесін үйретіп қана қоймай, оны күнделікті өмірде өз әрекетімен көрсетуі қажет. Себебі бала ересектердің іс-әрекетін қайталайды.
Жол қауіпсіздігі тек айыппұлдан қорқу арқылы қалыптаспауы тиіс. Ең бастысы – адам өмірінің құндылығын түсіну.
Жолдағы тәртіп – баршаға ортақ талап. Жүргізуші де, жаяу жүргінші де өз міндетін жауапкершілікпен орындаса, жол-көлік оқиғаларының алдын алуға мүмкіндік артады.
Тоғжан ЖОЛДЫҒАЛИ