Қазақстан Премьер-Министрі Әлихан Смайылов бүгін Үкімет отырысында қызылшамен күреске жергілікті әкімдер белсенді атсалысуы керектігін айтты.
«Аурудың таралуын тоқтату керек. Қызылша асқынып кетсе, балалардың денсаулығына аса қауіп төндіреді. Сондықтан онымен тек денсаулық сақтау жүйесі ғана емес, бүкіл қоғам болып күресуіміз қажет», – деді ол.
Үкімет басшысы қызылшаның таралуына байланысты екпе алу жұмыстарын күшейтуді тапсырды.
«Мұндай қауіпті вируспен екпеден өзге жолмен күресу мүмкін емес. Сондықтан екпе алуды күшейту қажет. Денсаулық сақтау министрлігі мен әкімдіктер вакцина алудың қажеттігі туралы ақпараттық түсіндіру жұмыстарын күшейтуі тиіс. Барлық әкімдер екпе алу мәселесін жеке бақылауда ұстап, Денсаулық сақтау министрлігімен бірге жұмысты үйлестіруі керек», – деді Әлихан Смайылов.
Айта кетейік, желтоқсан айында Қазақстанда 2-5 жастағы балаларды қызылшаға қарсы егу басталады.
Бүгін Үкімет отырысында Денсаулық сақтау министрі Ажар Ғиният тек қараша айында 6 мыңнан астам қазақстандық қызылша жұқтырғанын мәлімдеді.
