Мақсатжан Нурайсанов Алматы облысы Іле аудандық орталық ауруханасында 10 жылдан бері қызмет атқарып келеді. Мамандығы – зертханашы. Алматы қаласының 5 дүркін, Қазақстанның 3 дүркін чемпионы жақында Алматы қаласында грэпплинг спорты бойынша өткен халықаралық турнирде жеңімпаз атанды.
Бала кезінен спортпен айналысатын ол медицина саласын таңдауына анасының ықпалы болғанын айтады.
– Мен Республикалық жоғары медициналық колледжді аяқтаған соң, «Алматы» университетін биология мамандығы бойынша оқып, бакалавр дәрежесін алдым. Одан кейін зертханашы курсын оқыдым. Еңбек жолымды осы салада бастағанда мамандық таңдауда қателеспегенімді түсіндім. Әрі анамның арманы орындалды деп ойлаймын, – деді Мақсатжан Нурайсанов.
Іле аудандық орталық ауруханасының директоры Бауыржан Ысқақ маманның медицинамен қатар спорт саласының дамуына да үлес қосып жүргенін айтады.
– Мақсатжан орталық аурухананың тәжірибелі, әрі білікті маманы. Ауруханада 2013 жылдан бері қызмет атқарып келеді. Медицина саласымен қатар спорт саласына да еңбек сіңіріп, еліміздің намысын қорғап жүрген азаматтардың бірі, -деді Бауыржан Ысқақ.
Айта кетейік, Мақсатжанның кәсіби спорт (грэпплинг) саласында да жеткен жетістігі көп. Ол 2018 жылы Абу-Дабиде өткен әлем чемпионатына, 2021 жылы Ташкентте өткен Азия чемпионатына қатысқан. Өз салмақ дәрежесінде Азия бойынша үздік бес спортшының қатарында.
