Алматы облысының Ұйғыр ауданы Шонжы ауылында ұлттық және ат спорты түрлерінен чемпионат басталды. Alatau News сайтының хабарлауынша, 12 наурызға дейін жалғасатын додада спортшылар жамбы ату, теңге ілу, көкпар, дәстүрлі садақ ату, құмай тазыны шырғыға тартудан бақ сынайды. Садақ ату сайысына облыс спортшыларынан бөлек республиканың бес аймағынан мергендер қатысады. Жарыста барлығы 200-ге тарта спортшы сайысқа түседі.
«Біріншілік ұлттық спортты дәріптеу мақсатында ұйымдастырылды. Доданың өтуіне облыс әкімі Марат Сұлтанғазиев қолдау көрсетті. Жарыстың жоғары деңгейде өтетініне сенеміз», – деді ашылу салтанатында облыстық дене шынықтыру және спорт басқармасының басшысы Нұрбақыт Теңізбаев.
10 наурызда жамбы ату, дәстүрлі садақ ату, теңге ілудің іріктеу және ақтық кезеңдері, көкпардың іріктеу кезеңі, құмай тазыны шырғыға тартудың ақтық кезеңі өтеді. 11 наурызда көкпаршылар ширек финалда және жартылай финалда тартысқа түседі, 12 наурызда үшінші орын үшін және ақтық кезеңде тартысады.
Көкпарда 1-орын иеленген командаға 1 млн. теңге ақшалай жүлде, екінші орын алған командаға 500 мың теңге, 3-орын алған командаға 300 мың теңге тағайындалған. Бұдан бөлек, спортшыларға 50, 30 және 20 мың теңге сыйақы беріледі.
Әз Наурыз мейрамы қарсаңында ұлттық және ат спорты ойындарының дәріптеліп жатқанына тұрғындар разы.
«Шонжы шаңдауыт жер болса да, облыстық чемпионаттың ауылымызда өтіп жатқанына ризамыз. Бізден кейінгі өскелең ұрпаққа бұл шара – үлгі боларлық іс», – деді тұрғын Нақышбеков Рысдәулет.
