Үкімет пен әкімдер жұмыс істеу тәсілін түбегейлі өзгертуі тиіс. Бұл туралы Үкіметтің кеңейтілген отырысында Мемлекет басшысы Қасым-Жомарт Тоқаев айтты.
«Алдағы міндеттерді орындау үшін Үкіметке де, әкімдіктерге де тиісті құзырет берілген. Алайда, бұл мүмкіндіктер көп жағдайда дұрыс қолданылмай жатады. Соның кесірінен реформаларды жүзеге асыру қарқыны бәсеңдеп кетті. Мұндайды доғару керек. Мемлекеттік органдар арасында өзара келісу мен талқылау жұмысы аяқталғанша, кез келген бастаманың негізгі мән-маңызы да өзгеріп кетеді. Бюрократияны тоқтату қажет, бізге нақты нәтиже керек. Үкімет пен әкімдер жұмыс істеу тәсілін түбегейлі өзгертуге тиіс. Жұмыс барысында жүйелі ұстаным болуы қажет», – деді Президент.
Қасым-Жомарт Тоқаев мәселені жедел шешумен қатар, экономиканың ұзақ мерзімді дамуын қамтамасыз ету маңызды екенін баса айтты.
«Қазіргі жағдайда экономикамыздың мейлінше еркін дамуына мән беруіміз қажет. Елімізді дамудың жаңа белесіне шығарамыз десек, бұл жұмысты жедел және дәйекті түрде жүргізген жөн. Мен былтырғы Жолдауымда жаңа экономикалық саясаттың негізгі бағыттарын айқындап бердім. Сондықтан бүгін мен қазіргі экономикалық ахуалға қатысты өзекті мәселелерге тоқталамын», – деді Мемлекет басшысы.
Еске сала кетейік, 5 ақпанда Әлихан Смайылов басқаратын Қазақстан Үкіметі Қасым-Жомарт Тоқаевтың жарлығымен отставкаға кеткен. Ал кеше, Президент жарлығымен бұған дейін Президент әкімшілігінің жетекшісі, сыбайлас жемқорлыққа қарсы іс-қимыл агенттігінің төрағасы қызметтерін атқарған Олжас Бектенов елдің жаңа Премьер-министрі болып тағайындалған.
ҚазАқпарат
