Есік қаласындағы спорттық сауықтыру кешенінде дзюдо күресінен 2009-2010 және 2012-2013 жылдары туған кіші жасөспірімдер арасында «Алтын адам» республикалық ашық турнирі өтті.
Еңбекшіқазақ ауданында тұңғыш рет жалауын желбіреткен жастар арасындағы республикалық жарысқа Абай, Жамбыл, Қызылорда, Түркістан, Жетісу, Алматы облыстары мен Астана, Алматы қалаларынан 500-ден аса жас жеткіншек қатысып, 10 салмақ дәрежесі бойынша сынға түсті.
– «Алтын адам» республикалық ашық турнирін облыстық дене шынықтыру және спорт басқармасы және Еңбекшіқазақ ауданы әкімдігінің ұйымдастыруымен өткізіліп отыр. Аталған спорттық бәсеке алда бабаларымыздың ерлік рухын әйгілейтін белді күрес додасына айналып, дәстүрлі түрде жалғасын табады деген ойдамын. Бұл турнирге еліміздегі білікті төрешілер қазылық етті. Ал жарыс жеңімпаздары ҚР спорт шеберіне үміткер атануына мүмкіндік алды, – деді жарысты ұйымдастыру алқасының хатшысы Нұрғали Жолтаев.
Екі күнге созылған белдесуде мықтылар анықталып, олар арнайы медальдар және Мақтау қағаздарымен марапатталса, жүлдегердің бапкерлеріне ақшалай сыйлық табысталды. Командалық еспете Алматы облысы топ жарса, Алматы қаласы 2-орынға, ал Маңғыстау облысы 3-орынға ие болды.
