Күн мен түннің теңесіп, жаңа күннің келер басы – Наурыздың табалдырықтан аттайтын сәтіне де санаулы күн қалды. Төл мерекемізді тойлаудың жаңа дәстүрін қалыптастырып, оның мазмұнын идеологиялық мәнмен байыту үшін 14–23 наурыз аралығында өткізілетін Наурызнама онкүндігі жарияланды.
Наурыз мерекесі аясында өңірдің барлық аудандарында 700-ге жуық түрлі іс-шаралар өткізу жоспарланып отыр. Тұрғындарды ұлттық жарыстар, 2000 мың адамдық көш керуені мен мерекелік концерт күтеді, деп хабарлайды Өңірлік коммуникациялар қызметі.
Осыған орай, облыстың Наурыз мейрамына арналған бірыңғай логотипі әзірленді. Бұл туралы Алматы облысы ішкі саясат басқармасы басшысының міндетін атқарушы Әсел Жалғаспаева мен мәдениет, архивтер және құжаттама басқармасының басшысы Данияр Алиев айтты.
Сондай-ақ, 1 наурыз бен 25 наурыз аралығында аудандар мен Қонаев қаласындағы 92 ірі сауда орталықтарында «Наурыз Sale» атты жеңілдіктер науқаны өтіп жатыр. 11 наурыздан бастап 24 наурызға дейін мүдделі кәсіпкерлерді тарта отырып, адамдар көп жиналатын алаңдарда, ірі сауда орталықтарының алдында «Наурыз қалашықтары» ұйымдастырылуда. Бұл қалашықтарда қазақ үйлер тігіліп, көрмелер, жәрмеңкелер, тик-ток фотоалаңдары орналастырылады.
Әсел Жалғаспаеваның баяндауынша, айтулы күн Көрісу күнінен бастау алады. Наурызнаманың қорытынды күні жаңа жылды тұтас ел болып жаңа мақсат, жаңа үмітпен қарсы алудың символы ретінде Тазару күнімен аяқталады.
«Аудандар мен қалада Сүйінбай атындағы Алматы облыстық филармониясы мен «Алатау әуендері» ұжымының «Төрле, Наурыз, еліме» атты мерекелік гастрольдік концерттері өткізіледі. Барлық аудан, қалаларда «Bauyrsaq Party» бауырсақты тегін тарату акциясы ұйымдастырылады»,- деді Әсел Жалғаспаева.
Данияр Алиевтің сөзінше, жылды қарсы алу «Ынтымақ» көш-керуенімен басталып, облыс орталығына киіз үйлер тігумен ерекшеленеді. Көш 22 наурыз күні сағат 10:00-де басталады. Орталық алаңға жеткен «Ынтымақ» көш-шеруін Қонаев қаласы қарсы алады. Ұлттық салт-дәстүр бойынша, келген көшті «Ата Дәстүр» жөн-жоралғыларымен күтіп алады.
«Көшке 2000 адам қатысады. Бір аудан – бір Көш. Мәселен, Еңбекшіқазақ ауданы Сақ қорғандарымен, әйгілі Алтын адамымен ерекшеленеді. Көш-керуендердің өнері толық аяқталғаннан кейін «Жаңа күн» атты пролог басталады. 200 адам қатысатын Пролог күнді қарсы алу, көктемнің келуі, табиғаттың оянуы, Қыдыр атаның бата беруі сияқты дәстүрлерді қамтиды»,- дейді Данияр Алиев.
Мерекелік шара концерттік бағдарламамен жалғасын табады. Концерттік бағдарламада халық сүйіп тыңдайтын «Дос Мұқасан», Әбдіжаппар Әлқожа, Шәба Әденқұл, Мирас пен Құралай сияқты белгілі әншілер қатысады. Ал кешкі концерт сағат 19.00-де өтеді.
