Атырауда Ұлттық құрылтайдың III отырысы өткені белгілі. Онда ел Президенті Қасым-Жомарт Тоқаев еліміз үшін маңызды бірқатар мәселеге тоқталды. Соның бірі – Елтаңбаны ауыстыру жайы болды. Ол көптен бері айтылып келе жатқан мәселе болатын.
Бұл ретте Қасым-Жомарт Кемелұлы:
«Оны Кеңес заманындағы Гербке ұқсатып жатады. Тым эклектикалық, күрделі дейді. Мұндай ойды ел ісіне бей-жай қарамайтын белсенді азаматтар ғана емес, мамандар да айтып жүр. Орынды пайымдар ескерусіз қалмауы керек. Ортақ келісімге келген жағдайда арнаулы комиссия құруға болады. Бұл комиссия мәселені жан-жақты қарастырып, қоғамдық талқылау өткізеді. Сосын Қазақстанның жаңа Елтаңбасының жобасын жасауға ашық байқау жарияланады», – деді.
Расында да аяғынан нық тұрып, тәуелсіздігін тұғырлы еткен, жаңашылдыққа ұмтылған еліміз үшін ұлттық бейнемізді айқындайтын жаңа Елтаңбаның қажеттілігі уақыт күттірмейтін мәселе. Бұл ретте байқау жариялап, оған еліміздің дарынды суретшілері мен қылқалам иелерін қатыстыру қажет. Еркін ойлы талантты жастарды да тарта білген абзал. Елтаңба елдігіміздің белгісі болғандықтан ол барлық талапқа сай болуы тиіс. Осы орайда ел Президенті көтерген бастаманы қолдаймыз. Дер уақытында айтылған ұсыныс деп білеміз.
Ерболат Тұрымбетов,
Алматы облыстық ардагерлер ұйымының төрағасы
