Ақ сәлделі Алатаудың арайлы таңы атысымен сайлау учаскесіне аяңдаған Панфилов ауылының ақсамайлы тұрғыны Шайркүл Оскулиева және Айбек Мұқалиев ең алғашқы боп дауыс берді. Себебі, бүгін ел ертеңіне қызмет ететін депутаттардың сайланатын күні. Сондықтан дұрыс таңдау жасап, дауыс беру әрбір қазақстандық үшін аса маңызды. Осыны айқын сезінген сайлаушылардың күн көтеріле сайлау учаскесіне қарай бет алысы жиілеп келеді.
Аталған округтің Қарабұлақ ауылында тұратын қоғам белсенділері Галина Арзамасова, Виктор Герасименко, Қайнар Әміреевтер де ең алғашқы дауыс берушілер қатарынан көрінді.
– Депутат болуға үміткерлердің басты мақсаты – халықтың әл-ауқатын, тұрмыс-тіршілігін жақсартып, Жаңа Қазақстанның дамуына қарлығаштың қанатымен су сепкендей пайдасын тигізу ғой. Оның үстіне биылғы сайлаудың өзіндік ерекшелігі де жоқ емес. Ашық әрі әділ сайлау өтетіндігіне мол сеніммен кеп, өз кандидаттарымызға біркісідей дауыс бердік. Бұл – менің Қазақстан азаматы ретіндегі парызым, – дейді аталған ауыл тұрғындары.
Ауылдық округтегі №876, 877 сайлау учаскелерінде мерекелік көңіл-күй орнаған. Жинақылық пен тазалық, тәртіп салтанат құрып, сайлаушыларға айрықша құрмет көрсетілгендігін аңғару қиын емес. Сонымен қатар, сайлау учаскесінің есігіне ең бірінші боп енген сайлаушыларға сый-сияпат ұйымдастырылуы көңілді көктем еткендей.
Ұлбосын ИСАБЕК
Талғар ауданы
