Елімізде, 2023 жылдың 24 ақпанында жарияланған сайлау науқаны бүгін, 19 наурыз күні мәресіне таяп, сайлаушылар өздері тіркелген сайлау учаскелеріне асығуда.
Жас кезімнен өзімнің құқығымды пайдаланып, белсенді сайлаушы болып келемін. Бұл күнде жасым 75-ке таяп қалды. Бұрын таң ата салысымен сайлау учаскесіне қарай асығушы едім, қазір асықпай, таңғы шәйімді ішіп, таңдауымды тағы бір саралап, сағат 10-дар шамасында дауыс бердім. Мен өз таңдауымды жасадым! Елімнің, жас ұрпақтың жарқын болашағы үшін дауыс бердім!
Сайланатын депутаттар елімізде қордаланып қалған күрделі әлеуметтік-экономикалық мәселелердің жүйелі түрде шешілуіне ықпал етіп, билікке, тиісті лауазым иелеріне пікірлерін ашық айтып, талап қоя білетін, орындалатын заң қабылдауға үлес қосатын, саяси сауатты, білікті, білімді, терең ой иелері болатынына сенгім келеді. Үміткерлер көп болды, көбін халық танымайды да. Бәрі ел аралап, етігімен су кешіп, уәделерін үйіп-төгіп, терлеп-тепшіп, аяқтарынан тозып, «Есіктен- есікке» деген акция бойынша үгіт-насихат жұмыстарын жүргізді, елдің жағдайымен жете танысты, білді, ой түйді. Сайланып алған соң уәдеден таймай, заң шеңберінде адал, батыл түрде қызмет жасайды деп ойлаймын. Олар халықтың сенімінен шығып, үміттерін ақтауы тиіс! Халықпен үнемі байланыста болуы үшін әлеуметтік желіні пайдалануы керек. Енді сайлаудың қортындысына құлақ түріп отырамыз, халық дұрыс таңдау жасайды деп ойлаймын. Еліміз аман, жұртымыз тыныш болсын! Қазақтың Туы биікте желбірей берсін!
Тұрсынгүл Мұқанқызы,
Еңбек ардагері.
Талғар ауданы
