Кеген ауданының әкімдігінде бала құқықтары жөніндегі комиссияның кезекті көшпелі отырысы өтті.
Жиын барысында Саты ауылында болған қайғылы жағдайдан кейінгі мектеп оқушыларына қатысты ахуал талқыланды. Сонымен қатар комиссия мүшелері облыс әкімінің орынбасарына бірқатар ұсыныс жасады.
Нақтырақ айтқанда, аудан әкімінің міндетін атқарушы Кеңес Қабылбековтің айтуынша, төбелес нәтижесінде қайтыс болған оқушы Мирасты соққыға жықты деген Алишер Бақыт қазіргі таңда үй қамақта отыр. Оған психологтар күнде барып, көңіл-күйінің өзгеруі жайлы арнайы сараптама жүргізіп жатыр. Бұл іс бойынша сот келесі айда өтеді. Ал Сатыдағы мектептің директоры өз еркімен жұмыстан кетті. Оның оқу ісі және тәрбие ісі жөніндегі орынбасарлары болса, жұмыстан босатылды.
Жиынға қатысқан Алматы облысындағы бала құқықтары жөніндегі уәкіл Айгүл Есімбекова болса, балалар арасында әлімжеттік былтыр да болғанын айтты.
Десе де, аудан әкімі оқушылардың жағдайы бірқалыпты екенін және істің бақылауға алынғанын алға тартты.
Сондай-ақ Айгүл Есімбекова психологиялық тестілеудің нәтижелеріне сәйкес, Кеген ауданында 17 баланың суицидке бейімдігі анықталғанын айтты. Бүгінгі таңда ол оқушылармен психологтар жұмыс істеп жатыр.
Басқосуда өгей әке, өгей ана мәселесі де талқыға түсті. Себебі, елімізде аталған санаттағы адамдардың қолымен жасалған қылмыс саны көбейген. Түйіткілге байланысты облыс прокурорының орынбасары Азамат Күреңкей өңірдегі отбасылардың портретін жасауды ұсынды.
«Жобаны қолданысқа енгізу – жоғарыда айтылғандай оқыс оқиғалардың алдын алуға септігін тигізеді. Яғни, біз облыста тіркелген отбасылардың қандай жағдайда өмір сүріп жатқанын, әлеуметтік жағдайын зерттеп, арнайы тізім жасаймыз», – деді Азамат Күреңкей.
Өз кезегінде облыс әкімінің орынбасары Нұрлан Әбдірахым аудандағы мамандарға әр жағдайды уақытылы жеткізіп отыруды, оқушылардың арасындағы құқықбұзушылықтың алдын алу жұмыстарын күшейтуді тапсырды.
Alatau News
