Биылғы жылдың төрт айының қорытындысы бойынша Алматы облысының экономикасы өсу қарқынын сақтап отыр. Бұл туралы облыс әкімі Марат Сұлтанғазиев бүгін өткен брифингте айтты.
2022 жылдың әлеуметтік-экономикалық даму қорытындылары бойынша барлық салада тұрақты өсім болды. Жалпы өңірлік өнім 4 трлн. 249 млрд. теңгеге жетіп, 106,3% өсім көрсетті, бұл – республика бойынша 3 орын. Биылғы төрт айда өнеркәсіп өндірісінің көлемі 10,7 пайызға, сауда – 20,7 пайызға, құрылыс жұмыстары – 1,8 пайызға, ауыл шаруашылығы – 0,6 пайызға өсті”, – деді облыс әкімі.
Өңір басшысының сөзінше, жалпы Алматы облысы аграрлық-индустриалды аймақ ретінде танылған. Мұнда экономиканың өңдеуші секторына, оның ішінде ауыл шаруашылығы өнімдерін қайта өңдеуге ерекше басымдық беріледі.
“Мысалы, облыстың жалпы өңірлік өнімінің үштен бірін өнеркәсіп өнімі құрайды. Ал, экспортқа бағдарланған өңдеу саласының үлесі 90%-ға жетті немесе 503 млрд.теңге.
Юылтырғы жылдың 11 айының қорытындысы бойынша өңделген өнімдер экспорты 20 пайызға өсіп, шамамен 600 млн. АҚШ долларын құрады”, – деді Марат Сұлтанғазиев сөзінде.
Күні кеше Үкімет отырысында Премьер-министр Әлихан Смайылов ел экономикасының дамуы туралы есебінде осы жылдың алғашқы бес айының қорытындысы бойынша жалпы ішкі өнім көлемі 4,5 пайызға артқанын айтқан. Дегенмен, өңірлерге жеке жеке тоқталған Үкімет басшысы Абай, Ақмола, Батыс Қазақстан, Қостанай, Павлодар, Солтүстік Қазақстан, Ұлытау облыстары мен Алматы қаласында барлық негізгі макрокөрсеткіштер өскенін, ең төмен көрсеткіштер – Атырау және Алматы облыстарында екенін алға тартып, аталған өңір басшыларына тиісті шаралар қабылдауы қажет екенін ескерткен.
