Қонаев қаласында қазақ күресінен «Имам барысы» турнирі өтті. Облыста тұңғыш рет жалауы желбіреген додаға 80 келіге дейінгі және 80 келіден жоғары салмақ дәрежесi бойынша Іле, Қарасай, Талғар, Жамбыл, Еңбекшіқазақ, Ұйғыр аудандарынан келген мешіт имамдары қатысты.
Облыстық орталық мешіттің ұйытқы болуымен, жомарт жандардың демеушілігімен ұйымдастырылған турнирдің мақсаты – дін қызметкерлері арасында салауатты өмір салтын насихаттау, ұлттық спортты дамыту. Жарыста дін қызметкерлерінің кәсіби спортшылардай түрлі әдіс-тәсіл қолдана отырып, оңтайлы сәтті ұтымды пайдаланған тұстары, жеңіске деген жігерлері жанкүйерлердің делебесiн қоздырды.
Тартысқа толы болған жарыс қорытындысында 80 келіге дейінгі салмақ дәрежесінде Еңбекшіқазақ ауданы Ават ауылдық мешітінің бас имамы Дамир Оңғарбек 1-орынды жеңіп алды. 2-орынды Талғар ауданы Жаңалық ауылдық 1 мешітінің имамы Руслан Исабаев иеленді. 3-орынды Талғар ауданы Нұра ауылдық мешітінің наиб имамы Алмат Қабылхан еншіледі. 80 келіден жоғары салмақ дәрежесi бойынша Қарасай ауданы Жаңашамалған ауылындағы «Бірлік» мешітінің найб имамы Асанхожа Сабуров жеңімпаз атанды. 2-орынды Қаскелең қаласындағы «Іршат» мешітінің бас имамы Абдулмажит Абдулқадырұлы олжаласа, Жамбыл ауданы Ұзынағаш ауылдық мешіті имамы Бейсенбі Аврай 3-орынға ие болды.
Облыстың бас имамы Мадияр Пірімқұлов жарыстың жоғары деңгейде өтуіне белсене атсалысқан бірқатар азаматтарды Алғыс хатпен марапаттап, жеңімпаздарға Умраға жолдама, 2-орынға 200 мың, 3-орынға 100 мың теңге ақшалай сыйлық табыстады.
Айжарық КӨПТІЛЕУОВ,
Қонаев қаласы
