Қонаев қаласының әкімі Нұрлан Құматаев қаланы және оған қарасты ауылдарды газға қосу неліктен бәсеңдеп қалғанының себебін айтты. Әкімнің сөзінше, Шеңгелдіге газ тарту 2025 жылға қалдырылды. Себебі, қалада газдан басқа жүзеге асырылуы қажет бірнеше ірі жобалар бар. Ал қаладағы көпқабатты үйлердің тұрғындары газ қосуға бірауыздан келіспей, кикілжің болған. Қазіргі таңда бұл мәселе шешілді.
Жалпы көгілдір отынды тарту жұмысымен «Қонаев аймағының газ жүйелері» серіктестігі айналысады. Әкімдікпен екіжақты келісім негізінде компания биылғы жылдың аяғына дейін қаладағы барлық көпқабатты тұрғын үйлерді газға қоспақ. Ол үшін әр пәтер иесі тек 94 800 тг ақша төлейді.
Сондай-ақ Нұрлан Құматаевтың сөзінше, қаладағы шағынаудандарға газ тарту үшін жобалық-сметалық құжатын әзірлеуге 1 жыл кеткен. Биыл ықшамаудандар мен Арна, Заречный ауылдарын газға қосу басталады. Жеке үйдің газға қосылу құны 350 мың теңге.
Айта кетейік, Қарлығаш ықшамауданында автоматтандырылған газ тарту стансасы бар. Қала сол стансадан газ алып отыр. Оның қуатты 50 мың куб. Бұдан бөлек, Заречный ауылындағы орталық қазандықтың қуатын арттыру және газға ауыстыру бойынша жобалық-сметалық құжаттама әзірлеуге биыл 9,9 млн. теңге бөлінген.
Alatau News
