Өмір деген ұлы сапарда бағытыңнан жаңылмау, нағыз жақсы адамның үлгісі. Тағдыр сын тезіне салса да, жігерін жанып, жаңа биікке ұмтылу шын мықтының ғана қолынан келеді. Һәкім Абай айтқандай, «жорғалап жыланда, қалықтап қыранда» шығатын шыңға қол созды. Ол – Алматы облысындағы «Самға» сауықтыру орталығының негізін қалаушы Марат Абдулдаев.
Жігіт ағасы Алматы облысы Балқаш ауданының тумасы. Құрылыс саласында еңбек еткен еңбекқор жан қыл көпірлерді жалғап жүргенде өмірдің табақтап тартар тартуы барын білмеген еді.
Сырдың бойында көпір салып жүргенде биіктен құлдилап, мертіккен. Қас пен көздің арасында қос аяғы іс-қимылдан қалды. Солайша, құрылыс саласында еңбек еткен тепсе темір үзген жігіттің өмірінің желісі бір сәтте өзгеріп, сала берді.
Жүйрік уақыт жүйіткіп, сағаттар сырғып, мнуттар жылжып, опат болған күннен арада 10 жыл өтен соң Марат Бекенұлы жарқын өмірге қайта оралды. Ол «Самға» орталығын ашып, қанатын қайта қомдады.
«Самғау орталығы 2017 жылы ашылды. Негізгі идеясы өзімдікі. Мақсатым-денсаулығында кінәраты бар балаларды сауықтыру. Осыдан екі жыл бұрын иппотерапия қызметін көрсетуді бастадық. Жылқымен серуен арқылы қабылданатын емнің бұл түріне «Жақсылық» деген ат қойдық. Мұндағы балаларда өз дертін жеңіп шығып, Жақсылық Үшкемпіров сынды чемпион болсын деген ой еді»,-дейді Марат Абдуллаев.
«Самғау» орталығында бүгінгі күні 30 бала ем қабылдайды. Мұнда арнаулы мамандар балалармен жұмыс жасайды. Нәтижеде жоқ емес. Орталықтың табалдырығын аттаған кезден араға көп уақыт салмай-ақ, ем-дом өз жемісін беруде. Орталыққа келетін балалардың ата-аналары да бұл игі бастамаға дән риза.
Орталықта тек ем жүргізіліп қоймайды. Бүлдіршіндердің көңілін аулау үшінде түрлі шаралар өткізіледі. Мәселен, күні кеше жаңа жылдық арнаулы кеш өтті. Әрбір балаға мерекелік сыйлықтар табысталды. Бұл кеш тек ойын-сауықпен ғана шектелмей, шынайы жылулық пен бірлікті көрсетті.
Бүгінгі күнде санмыңдаған кембағалы жанның аяққа тұруына, рухани нығаюына қол ұшын созған, Марат Бекенұлы адамдық пен адалдықты, арман мен мақсатты қатар қою арқылы бел белесіне жетті. Биік көпірден аяғы тайғанымен өмірде өз биігінен құламай, шыққан шыңында табандап тұрды. Осылайша, жылқы мінез қазақтың қайсар азаматы, шектеулі мүмкіндігіне қарамастан өмірдің тізгінін қолына алып, қайтадан еріне қонды. Тағдыры аямасада, арманын аялаған Марат Бекенұлының келбеті осындай.
