Автобустар оқушылары көп Еңбекшіқазақ, Жамбыл, Талғар және Іле ауданындағы мектептерге берілді. Облыс әкімі Марат Сұлтанғазиев көліктердің кілтін аудандық білім бөлімінің басшыларына салтанатты түрде табыс етті.
«Қуанса, бала қуансын» дегендей, бүгін біз осындай қуанышты күннің куәсі болып отырмыз. Лизингтік қаржыландыру арқылы 34 автобус сатып алынды. Елімізді көркейтер жас ұрпақтың толыққанды білім алуына жағдай жасау – міндетіміз. Автокөліктер балалардың игілігіне қызмет ете берсін», – деді Марат Сұлтанғазиев.
Айта кетейік, бүгінгі таңда облыста 339 мыңнан астам оқушы білім алады. Халқы тығыз орналасқан аудандарда 199 елді мекендерден 30164 бала тасымалдау арқылы орта біліммен қамтылып отыр.
