Синоптиктердің болжамы бойынша, 11-13 шілде аралығында еліміздің басым бөлігінде күн күрт ысып, ауа температурасы 43 градусқа дейін көтеріледі. Сондықтан мамандар осы күндері барынша сақтанып жүру керектігін ескертеді.
Аптап ыстық та қатты суық сияқты адам денсаулығына кері әсерін тигізеді. Әсіресе, созылмалы ауруы бар жандар үшін өте қауіпті. Дәрігерлер кеңесіне құлақ түретін болсақ, қатты ыстықта егде жастағы адамдар аса бір қажеттілік туындамаса, үйлерінен шықпағаны абзал. Бөлме ішін жиі-жиі желдетіп, суды көбірек ішуі керек.
Сондай-ақ, күн қатты ысығанда балаларды назардан тыс қалдырмаған жөн. Оларды ерекше қадағалап, мүмкіндігінше ашық аспан астында ойнатпаған дұрыс.
Көшеде жүрген кезде бас киімді тастамау керек. Қолшатырмен жүрсе тіптен жақсы. Өйткені ол сәл де болса күн сәулесінен қорғайды.
Көлік жүргізушілері өзімен бірге салқындатылған сусын алып жүріп, мойынға дымқыл орамал тағып алуды да ұмытпау керек.
Міне, осындай қарапайым ғана ережелерді сақтау арқылы адамдар аптап ыстықта қиналмайтын болады.
