Биыл күзден бастап елімізде көлік жүргізушілеріне көліктерінің техникалық жарамдылығын растайтын құжатын өздерімен алып жүру қажет болмайды. Индустрия және инфрақұрылымдық даму министрлігінің хабарлауынша, ендігіде «Техникалық байқаудың диагностикалық картасы» электронды үкімет порталының мобильді қосымшасында азаматтардың жеке кабинетінде сақталады.
Министрлік «Ұлттық ақпараттық технологиялар» акционерлік қоғамымен бірлесіп, қазір көліктің техникалық байқаудан өткенін растайтын құжатты цифрлы форматқа көшіру жұмыстарын атқарып жатыр. Аталған қызмет сынақ түрінде алдағы 1-қыркүйекте EgovMobile платформасында іске қосылмақ. Құзырлы органдар ендігіде аталған құжаттың цифрлы нұсқасын онлайн түрде тексере алады.
Елімізде құжат рәсімдеу қызметтерін цифрландыру сыбайлас жемқорлық қаупін азайту, бюрократиялық рәсімдер мен кедергілерді жою жолындағы ауқымды шаралардың бір парасы саналады. Көлік құралының техникалық тексеруден өткенін куәландыратын құжат елімізде цифрлы форматқа көшірілген алғашқы құжат емес. Бұған дейін жүргізуші куәлігін жаңарту, көлікті сату және сатып алуды рәсімдеу, көлік құралдарының сақтандыру сертификатын дайындау қызметтері мен құжаттары да онлайн форматқа көшірілген.
