Орталық сайлау комиссиясының мүшесі Шавхат Өтемісов АЭС құрылысына қатысты референдумға дайындық жұмыстары жөнінде түсінік берді.
Парламент Мәжілісінде тілшілер сұрағына жауап берген Шавхат Өтемісов ОСК референдум өткізу жұмыстарына дайын екенін айтты.
«Референдум өтетіні жайында жарияланды. Оны өткізу мерзімі кейінірек мәлім болады. Жалпы, Орталық сайлау комиссиясы бұл жұмыстарға дайын. Яғни сайлаушылар тізімін құру, аумақтық сайлау комиссияларына қатысты жұмыстар ескерілген», – деді Шавхат Өтемісов.
Осы орайда ОСК мүшесі алдағы уақытта барлық жоспарлы іс-шаралар атқарылатынын айтты. Сонымен қатар тілшілер рефрендумды биыл өткізу туралы шешім жасалса, Орталық сайлау комиссиясы бұл науқанға қаншалықты дайын екенін сұрады.
«Референдум мерзімі әлі жарияланған жоқ. Егер биыл ұйымдастыру туралы шешім жасалса, Орталық сайлау комиссиясы дайын болады», – деді ОСК мүшесі.
Мемлекет басшысы Қасым-Жомарт Тоқаев биыл 1 қыркүйектегі халыққа жолдауында атом электр стансасын салу, салмау мәселесін жалпыұлттық референдум арқылы шешу керек екенін мәлімдеген. Президент бұл мәселе бойынша қоғамдық талқылауларды, халыққа егжей-тегжейлі, кең ауқымды түсіндіру жұмыстарын жалғастыра беру қажет екенін айтқан.
